Një atentat ka ndodhur këtë të martë në Kumanovë, Maqedoni e Veriut, ku kandidati i Bashkimit Demokratik për Integrim (BDI) dhe bartës i listës së këshilltarëve në komunën e Likovës, Zekirja Shahini, 43 vjeç, u qëllua nga persona të maskuar.
Sipas njoftimit zyrtar të partisë, Shahini mori tre plumba në këmbë dhe u transportua menjëherë në spitalin e Kumanovës, ku ndodhet jashtë rrezikut për jetën. Dëshmitarët raportojnë se agresori mbante maskë dhe u largua shpejt nga vendngjarja.
Forcat policore dhe grupi hetimor ndodhen në terren dhe po vijojnë hetimet për të zbardhur rrethanat e sulmit dhe për të identifikuar autorët.
Në një reagim zyrtar, BDI njoftoi pezullimin e aktiviteteve për ditën e sotme, dënoi aktin e dhunës dhe kërkoi nga institucionet e rendit dhe drejtësia masa të menjëhershme për arrestimin e autorëve.
Partia gjithashtu bëri thirrje ndaj qytetarëve dhe mbështetësve të saj të ruajnë qetësinë dhe të mos bien pre e provokimeve, duke theksuar rëndësinë e rikthimit të sigurisë dhe besimit publik në periudhën e fushatës zgjedhore.
