Pas pesë vitesh arrati, policia italiane ka vënë në pranga një nga figurat kryesore të mafias “Società foggiana”, Leonardo Gesualdo, 39 vjeç, i konsideruar ndër më të kërkuarit në Itali.
Operacioni u zhvillua në orët e para të mëngjesit të së martës nga forcat speciale të karabinierëve (GIS), të cilat ndërhynë në mënyrë të befasishme në një banesë në periferi të Foggias, ku Gesualdo po flinte.
Sipas mediave italiane, ai u arrestua pa bërë rezistencë, ndërsa gjatë kontrollit në banesë policia gjeti një pistoletë me gjashtë fishekë të ngarkuar në karikator.
Gesualdo ishte në kërkim që prej vitit 2020, kur kishte shpëtuar nga një operacion i madh policor që çoi në arrestimin e 44 personave, të akuzuar për zhvatje, trafik dhe veprimtari të tjera kriminale.
Ai ishte dënuar me 12 vite burg dhe konsiderohej një nga krerët më të rrezikshëm të mafias foggiane, strukturë që prej vitesh konsiderohet një nga degët më të dhunshme të krimit të organizuar në jug të Italisë.
Pamjet e arrestimit, të publikuara nga policia italiane, tregojnë momentin kur forcat speciale i mësyjnë banesës dhe e kapin mafiozin në gjumë, duke i dhënë fund një arratie disa-vjeçare.
