Ngjarja e rëndë e pasdites së sotme në sallën e Gjykatës së Apelit në Tiranë, ku gjyqtari Astrit Kalaja u qëllua për vdekje dhe mbetën të plagosur dy persona të tjerë, ka tërhequr vëmendjen e mediave ndërkombëtare.
Sipas raportimeve, autori, 30-vjeçari Elvis Shkëmbi, kishte një çështje pronësie në proces me gjyqtarin dhe palët e tjera të përfshira. Pas sulmit, autori u largua, por u arrestua nga policia jashtë godinës së gjykatës.
Mediat ndërkombëtare, përfshirë The Guardian, Associated Press dhe Balkan Insight, kanë cilësuar ngjarjen si jashtëzakonisht të rëndë dhe kanë raportuar mbi rrethanat e krimit dhe arrestimin e autorit.
The Guardian shkruan se gjyqtari u qëllua brenda sallës së gjyqit dhe vdiq gjatë transportimit për në spital, ndërsa AP nënvizon se sulmi ndodhi gjatë një seance gjyqësore dhe autorit iu bë arrestimi i menjëhershëm. Balkan Insight thekson reagimet e tronditura të udhëheqësve politikë në Shqipëri pas krimit.
