Policia e Tiranës ka dhënë një reagim zyrtar lidhur me ngjarjen e rëndë që ndodhi sot në Gjykatën e Apelit të Juridiksionit të Përgjithshëm në Tiranë, ku gjyqtari Astrit Kalaja u vra gjatë një procesi gjyqësor.
Sipas njoftimit të policisë, rreth orës 15:40 një person i armatosur, 30-vjeçari E.SH, palë në një konflikt gjyqësor, qëlloi me armë zjarri drejt gjyqtarit Kalaja dhe dy qytetarëve të tjerë, babë e bir, Rakip dhe Ervis Kurtaj, të cilët ndodheshin në seancë si pala tjetër në proces.
Si pasojë e sulmit, gjyqtari Kalaja ka humbur jetën, ndërsa të plagosurit, babë e bir, ndodhen jashtë rrezikut për jetën dhe po marrin trajtim mjekësor në spital.
Njoftimi:
Rreth orës 15:40, në ambientet e Gjykatës së Apelit të Juridiksionit të Përgjithshëm Tiranë, gjatë një procesi gjyqësor, dyshohet se shtetasi E. Sh., 30 vjeç (palë në proces) ka qëlluar me armë zjarri drejt gjyqtarit, shtetasit A. K., dhe shtetasve R. K., 65 vjeç dhe E. K., 45 vjeç, atë e bir (pala tjetër në proces).
Si pasojë ka humbur jetën shtetasi A. K. dhe janë plagosur shtetasit R. K. dhe E. K, të cilët janë jashtë rrezikut për jetën.
Shërbimet e Policisë me marrjen e njoftimit kanë shkuar menjëherë në vendngjarje dhe kanë bërë të mundur kapjen dhe shoqërimin në ambientet e DVP Tiranë, të autorit të dyshuar, shtetasin E. Sh., si dhe kanë sekuestruar armën e krimit.
Në vijim do të jepet informacion më i plotë për ngjarjen.
