Në mbledhjen e së enjtes, Këshilli i Lartë i Prokurorisë rrëzoi propozimin e Inspektorit të Lartë të Drejtësisë (ILD) për caktimin e masës disiplinore “Vërejtje publike” ndaj prokurores së Korçës, Anjeza Kalanxhi.
Kalanxhi u hetua nga ILD për shkelje të dispozitave që rregullojnë organizimin dhe funksionimin e prokurorisë si dhe për shkelje të rregullave të konfidencialitetit, pasi kishte dhënë të tretëve kopje të disa akteve në një dosje hetimore.
ILD pretendoi se ky veprim kishte “cënuar imazhin e zyrës së prokurorisë, teksa publikimi i akteve procedurale mbart rrezikun e ardhjes së pasojave në dëm të hetimit dhe për rrjedhojë humbjen e besimit të publikut për funksionimin e Prokurorisë sipas ligjit dhe jo dëshirës së magjistratit”. Sipas ILD, Kalanxhi shpërndau materiale të dosjes në disa institucione, përfshirë edhe një ambasadë.
Kalanxhi këmbënguli se nuk kishte kryer shkelje dhe se kishte vepruar pas një përballjeje në sallën e gjyqit me një person me rrezikshmëri të lartë.
Pas shqyrtimit të çështjes me dyer të mbyllura, KLP njoftoi rrëzimin e kërkesës së ILD-së.
