Policia e Tiranës ka arrestuar katër persona për kanosje. Në rastin e parë, S.H., 30 vjeç, dhe L.H., 21 vjeç, morën peng një të mitur, duke e mbajtur në automjet, me pretendimin se ai kishte vjedhur para në subjektin e tyre.
Në rastin e dytë, autori J.B., 18 vjeç, u kap në flagrancë teksa merrte 5,000 euro nga një 21-vjeçar, për të mos publikuar një video në rrjete sociale. Bashkëpunëtori i tij, A. Gj., 20 vjeç, shpallet në kërkim.
“specialistët për Hetimin e Krimeve të Rënda, në kuadër të operacionit “Këmbimi”, arrestuan në flagrancë shtetasin J. B., 18 vjeç dhe shpallën në kërkim shtetasin A. Gj., 20 vjeç, pasi dyshohet se kanë kanosur një 21-vjeçar, për t’iu dhënë 5000 euro, me qëllim mospublikimin në rrjete sociale, të një videoje të tij. 18-vjeçari u kap në flagrancë, teksa i merrte 21-vjeçarit, shumën e eurove, ndërsa për kapjen e 20-vjeçarit, Policia vijon punën. Me cilësinë e provës materiale u sekuestruan shuma e eurove dhe 3 celularë;
specialistët për Hetimin e Krimeve të Komisariatit të Policisë Nr. 4, në kuadër të operacionit “Këmbimi”, arrestuan shtetasit S. H., 30 vjeç dhe L. H., 21 vjeç, pasi dyshohet se i kanë hequr lirinë një të mituri, duke e mbajtur në automjet, me pretendimin se kishte vjedhur para në subjektin e tyre. Me cilësinë e provës materiale u sekuestrua automjeti i përdorur nga 2 të arrestuarit, për rastin. Punohet për dokumentimin e plotë të rrethanave të këtij rasti.”, njofton policia.
