Personi që shihni në foto është Enea Kume, vëllai i deputetit të PS-së, Loer Kume, i cili u arrestua sot gjatë një operacioni të zhvilluar nga SPAK në Durrës.
Operacioni, sipas raportimeve arrestimi i Kumes, lidhet me tjetërsim pronash në zonën bregdetare.
Kontrolle janë kryer gjithashtu edhe në banesën e Aleksandër Lahos, i njohur si “Rrumi i Shijakut”, një personazh i njohur i botës së krimit.
Ndërkohë vetë deputeti Kume ka qenë sot live në një intervistë televizive kur u bë publik lajmi për arrestimin e vëllait të tij. Loer Kume ka bërë të ditur se i vëllai është arrestuar mbrëmjen e djeshme dhe se për sa kohë nuk ka një vendim fajësie, ai do të konsiderohet i pafajshëm.
Ndër të tjera, deputeti i PS-së tha se në fund secili mban vetë përgjegjësi për jetën e vet dhe vendimet që merr.
“U vura mbrëmë në dijeni, është arrestuar dhe është i dyshuar dhe për sa kohë nuk ka një vendim fajësie do ta konsideroj të pafajshëm deri në momentin që drejtësia të flasë. Por gjithkush është përgjegjës për jetën dhe vendimet që merr në jetën e tij, por të mos flasim para kohe”, u shpreh deputeti Loer Kume.
