Nga një perlë natyrore ku njerëzit shkonin për ajër të pastër e qetësi, liqeni i Farkës po shndërrohet në skenografi të betonit. Çdo ditë që kalon, një tjetër copë gjelbërim zhduket nën themelet e rezidencave luksoze.
Ndërtimi pa kriter po shkatërron natyrën dhe po kthen një nga zonat më të bukura të Tiranës në kantier gjigant betoni.
Në një fotografi që qarkullon së fundmi në rrjet, pamjet tregojnë qartë sesi hapësira e gjelbërimit është zëvendësuar me ndërtesa të mëdha, ndërsa liqeni rrezikon të shndërrohet në dekor të pallateve luksoze, duke humbur funksionin dhe vlerën e tij si pasuri natyrore.
Sipas hulumtimeve të “JOQ“, bëhet fjalë për rezidencën “Swan Residence” e biznesmenit Gentjan Sula, e cila ka ndezur reagime të forta nga qytetarët.
Komentet e qytet arëve të irrituar:
- “Po e thajnë liqenin!” – Shumë qytetarë shprehen se këto ndërtime do të ndryshojnë krejtësisht ekosistemin. Për ta, liqeni do të humbasë kuptimin, pasi është kthyer vetëm në sfond të ndërtimeve të reja.
- “Qeveritarë të paturp, vetëm fukaranë dinë ta ndëshkojnë” – Reagimet shënjestrojnë klasën politike dhe pushtetin vendor që lejojnë ndërtimet masive. Qytetarët thonë se institucionet mbyllin sytë përballë projekteve të mëdha, ndërsa ndëshkojnë qytetarë të thjeshtë që riparojnë shtëpitë e tyre.
- “Kapitalizëm i egër në emër të fitimit” – Disa e shohin këtë si pasqyrë të mënyrës sesi është keqkuptuar demokracia në Shqipëri. Për ta, çdo gjë është shndërruar në biznes dhe askush nuk merr parasysh natyrën apo interesin publik.
- “Derdhin ujërat në liqen” – Një tjetër shqetësim është ndotja. Banorë të zonës pohojnë se ujërat e zeza të ndërtimeve derdhen drejt e në liqen, duke e kthyer atë në një “gropë skeptike” ku humbet çdo standard mjedisor.
- “Qeveri monstër, popull dele” – Reagimi më i ashpër lidhet me faktin se shoqëria hesht. Sipas tyre, është një kombinim i frikshëm: pushtet i babëzitur dhe qytetarë të dorëzuar që nuk protestojnë dot. Për ta, kjo është arsyeja pse nuk ka mbetur më asnjë cep i gjelbër pa u betonizuar.
Ky është vetëm një nga shembujt ku pasuria natyrore po zhduket përballë interesave të ndërtuesve, ndërsa Tirana e rrethinat e saj po kthehen ngadalë në një grumbull betoni./JOQ
