Policia ka arrestuar dy persona në zonën e Bathores për trafik droge dhe armëmbajtje pa leje.
Në pranga ranë Agron Tafaj, 53 vjeç, banues në fshatin Gjormë, Laç, dhe Tajson Tafa, 27 vjeç, banues në Tiranë.
Të dy personat kanë precedentë penalë në fushën e narkotikëve dhe u kapën në flagrancë në zonën e Bathores, ndërsa transportonin 4 kilogramë kanabis me qëllim shitjen në doza në zonat e Bathores dhe Kamzës.
Pas arrestimit, shërbimet e policisë kryen kontrolle në banesat e të dyshuarve. Në banesën e 53-vjeçarit në Gjormë u zbulua një ambient i përshtatur për kultivimin e bimëve narkotike me ndriçim artificial. Gjatë kontrollit u sekuestruan:
48 bimë dhe 120 fidanë cannabis sativa të kultivuara në vazo
7 kilogramë lëndë e dyshuar narkotike kanabis
4 kallëpe tritol
2 granata dore
2 ndezës
7 fitila detonatorë
3 kuti me ndezës minash luftarake
Në banesën e 27-vjeçarit në Tiranë u gjetën dhe u sekuestruan:
1 kilogram lëndë narkotike kanabis
1 peshore elektronike
1 shufër metalike
1 armë e ftohtë (thikë)
Në total, nga operacioni u sekuestruan 12 kilogramë kanabis, 168 bimë e fidanë narkotikë, municione luftarake, armë të ftohta dhe pajisje për shpërndarje droge.
