Biznesmeni italian Edoardo Sarchi, 44 vjeç, është vrarë me armë zjarri në Salari të Tepelenës. Ngjarja ka ndodhur rreth orës 00:30, në fshatin Salari, në vendin e quajtur “Dilan”, midis fshatrave Nivicë dhe Salari, në aksin rural që lidh këto dy zona.
Edoardo Sarchi ishte pronar i një fabrike tullash në Tiranë, EDIL Centro.
Sipas burimeve, viktima udhëtonte në automjet me persona të tjerë kur një person i armatosur ka dalë para duke qëlluar drejt tyre.
Pas sulmit drejtuesi i mjetit raportohet se ka vijuar rrugën me shpejtësi.
- Dëshmia e shoferit
Shoferi i biznesmenit italian ka dëshmuar për uniformat blu se si ka ndodhur ngjarja e rëndë.
Sipas dëshmisë së shoferit, Gazmend Braçe u doli përpara makinës dhe ngriti dorën për ta ndaluar dhe në atë moment autori ka hapur zjarr duke qëlluar shtetasin italian.
- E shkuara e errët e Gazmend Braçes
Gazmend Braçe është djali i Eqerem Braçes, dhe nip i Gramoz Ruçit.
Gazmend Braçe u arrestua në vitin 2019 pasi i mori armën nga brezi oficerit të patrullës së policisë dhe plagosi me të Aleksandër Zhapajn gjatë kohës që të dy po shoqëronin në spital një të afërm të lënduar gjatë një sherri në një lokal në Levan të Fierit.
Gazmend Braçe, 22 vjeç në atë kohë, akuzohej për veprat penale “Vrasje me dashje mbetur në tentativë” e “Goditje për shkak detyrës të punonjësit të rendit publik”.
Mik me Tërmet Peçin
Sipas burimeve jozyrtare, firma të lidhura me Eqerem Braçen dyshohet se kanë përfituar rregullisht tenderë nga Bashkia Tepelenë, gjatë kohës që kryetar ka qenë Termet Peçi, një figurë politike që disa e konsiderojnë si “aleat të ngushtë” të familjes Braçe.
- Policia ngre postblloqe për kapjen e autorit
Policia ka shpallur në kërkim Gazmend Braçen, si autor i dyshuar i ngjarjes, dhe ka ngritur disa postblloqe në zonë për kapjen e tij.
“Rreth orës 00:30, në fshatin Salari, në vendin e quajtur “Dilan”, në rrugë është gjetur pa shenja jete shtetasi italian E. S., 44 vjeç, banues në Tiranë, i cili dyshohet se është vrarë me armë zjarri.
Shërbimet e Policisë, me marrjen e njoftimit, shkuan menjëherë në vendin e ngjarjes.
Është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave.”– njofton policia.
Në terren janë angazhuar forcat e Drejtorive Vendore të Policisë së Fierit dhe Vlorës, të cilat po kryejnë kontrolle të zgjeruara në zonë dhe në disa ambiente të dyshuara, me qëllim lokalizimin dhe ndalimin e autorit.
Deri në këto momente, ende nuk ka të dhëna për motivin e krimit.
