Mbrëmjen e djeshme, më 23 shtator, është bërë prezantimi i romanit autobiografik KREUZTANNE të ambasadorit shqiptar në Austri, Fate Velaj, i shoqëruar shoqëruar me pikturat dhe fotografitë të realizuara prej tij.
Aktiviteti u mbajt në qytetin Traiskirchen , në një sallë ku të pranishëm ishin shumë ambasadorë si dhe dashamirë të shumtë të letërsisë, ku mes tyre dhe dhe zëvendëskancelari dhe ministër austriak i Kulturës Andreas Babler.
Ishte një takim thellësisht njerëzor – larg duartrokitjeve të përsëritura për Mozartin dhe Beethovenin.
Publiku dëgjoi historinë prekëse të një djali të ri nga Vlora, nga një Shqipëri që asokohe ishte e izoluar nga bota. Një i ri që ëndërronte të jetonte në metropole, por që fati pas rënies së komunizmit në vitin 1991 e çoi në një bujtinë të vogël në malet austriake.
Prej andej filloi një jetë e re: si larës enësh, si punëtor fabrike në tri turne – dhe pas punës ai “zhyste duart në ngjyra”, për t’u bërë një ditë një artist i njohur. Një histori djersësh dhe lotësh. Midis jetës dhe vdekjes për tu rikthyer në jetë, më i fortë se kurrë më parë.
“Ky libër nuk është vetëm një vepër letrare, por edhe një histori thellësisht personale dhe politike. Historia e Fate Velajt është një histori austriake, një histori shqiptare – por mbi të gjitha një histori evropiane. Çfarë është Evropa, nëse ajo nuk do të ishte pikë takimi dhe integrimi? Dhe çfarë do të ishte Evropa pa ndërtues urash si Fate Velaj?
Fate Velaj, në krijimtarinë e tij, bashkon artin, kulturën dhe politikën – dhe me këtë ka kontribuar në mënyrë vendimtare në mirëkuptimin e ndërsjellë midis Austrisë dhe Shqipërisë, midis Evropës Juglindore dhe Bashkimit Evropian…
I dashur Fate, historia jote tregon: Evropa nuk rritet vetëm përmes traktateve, por mbi të gjitha përmes njerëzve që ndërtojnë ura. Për këtë dua të të falënderoj nga zemra.” – tha zëvendëskancelari Andreas Babler, gjatë fjalës së tij.
