Sot, Komisioni Evropian i propozoi shteteve anëtare miratimin e paketës së 19-të të sanksioneve kundër Rusisë, për shkak të luftës në Ukrainë, me theks të veçantë ndaj kompanive ruse të energjisë, bëri të ditur zëdhënësja e Komisionit, Paula Pinho.
Presidentja e Komisionit, Ursula von der Leyen, njoftoi të martën “masa shtesë” të BE-së kundër Moskës, të synuara drejt sektorit të energjisë, kriptovalutave dhe bankave, pas bisedës me Presidentin amerikan Donald Trump, raportoi AFP.
Trump u ka kërkuar aleatëve evropianë të ndalojnë blerjen e naftës ruse përpara se ai të ndërmarrë masa ndëshkuese kundër Moskës dhe të vendosë tarifa ndaj Kinës, për shkak të blerjes së karburanteve nga Rusia.
Sipas të dhënave të AP, BE-ja tashmë ka ndaluar shumicën e importeve të naftës ruse, duke e ulur varësinë nga 29 për qind në fillim të vitit 2021 në vetëm 2 për qind në mesin e vitit 2025.
“Ekonomia e luftës e Rusisë, e mbështetur nga të ardhurat nga lëndët djegëse fosile, po financon gjakderdhjen në Ukrainë. Për ta ndalur këtë, Komisioni do të propozojë përshpejtimin e heqjes graduale të importeve ruse të lëndëve djegëse fosile”, deklaroi Von der Leyen.
