Grupi Parlamentar i Partisë Demokratike ka dorëzuar zyrtarisht kërkesën për shkarkimin e Kryetarit të Kuvendit, Niko Peleshi, duke akuzuar atë për shkelje të rënda të Kushtetutës dhe Rregullores së Kuvendit dhe për njëanshmëri politike në drejtimin e organit më të rëndësishëm kushtetues.
Sipas kërkesës së PD-së, e drejtuar Këshillit për Legjislacionin, Peleshi ka drejtuar dy seanca plenare që nga zgjedhja e tij më 12 shtator 2025 (më 16 dhe 18 shtator), gjatë të cilave sipas opozitës, ka vepruar në kundërshtim të hapur me ligjin dhe ka mohuar të drejtat e deputetëve opozitarë.
Në veçanti, PD-ja akuzon Peleshin për thirrjen e dy seancave të një dite më 16 shtator 2025:
– Seanca e parë, në orën 10:00, me rend dite: miratimi i procesverbaleve të seancave, njoftime, zgjedhja e zëvendëskryetarëve të Kuvendit, sekretariateve dhe përbërjes së Byrosë së Kuvendit.
– Seanca e dytë, në orën 17:00, me rend dite: zgjedhja e kryesive të komisioneve të përhershme të Kuvendit.
Grupi Parlamentar i PD-së argumenton se këto veprime kanë çuar në “asgjesimin e Parlamentit” dhe kërkon ndërhyrje të menjëhershme nga Këshilli për Legjislacionin për të shqyrtuar shkarkimin e kryetarit të Kuvendit.
Kërkesa e plotë e PD-së përfshin 11 shkelje të ndara dhe do të shqyrtohet nga organet përkatëse të Kuvendit.
