Në Gjykatën e Posaçme kundër Krimit dhe Korrupsionit (GJKKO) po zhvillohet procesi ndaj ish-ministrit të Shëndetësisë, Ilir Beqaj, i akuzuar fillimisht për shpërdorim detyre në kuadër të koncesionit të sterilizimit.
Gjatë seancës, Beqaj deklaroi se nuk kishte marrë njoftim zyrtar për ndryshimin e cilësimit ligjor të akuzës, që prokuroria kishte propozuar të rikualifikohej në “vjedhje duke shpërdoruar detyrën”.
Ai shtoi se ishte njohur vetëm me akuzën fillestare dhe kërkoi kohë shtesë për të studiuar dokumentacionin e ri dhe për të përgatitur mbrojtjen e tij.
“Akuza e re ndaj meje nuk më është komunikuar kurrë. Është një situatë paligjshmërie, pasi nuk kam asnjë njoftim nga Prokuroria për akuzën e vjedhjes. Jam njoftuar vetëm për shpërdorim detyre”, tha Beqaj.
Avokatët e ish-ministrit kërkuan që gjykata t’u mundësonte kohë të mjaftueshme për shqyrtimin e aktve dhe përgatitjen e mbrojtjes, kërkesë që u pranua, duke shtyrë seancën për një datë të mëvonshme.
Beqaj po hetohet për dosjen e koncesionit të sterilizimit, ku janë të përfshirë gjithashtu ish-zëvendësministri Klodian Rrjepaj dhe biznesmeni Ilir Rrapaj, të cilët po përballen me akuza të ngjashme.
