Skuadra italiane e futbollit Crotone, që garon aktualisht në Serinë C, është vendosur nën administrim gjyqësor për një periudhë njëvjeçare, pas hetimeve të autoriteteve që gjetën “prova të mjaftueshme” për një ndikim të gjerë të mafias në veprimtarinë e klubit. Lajmi u bë i ditur të martën nga Prokuroria e Katanzaros.
Crotone, me seli në rajonin jugor të Kalabrisë, vendlindja e organizatës së fuqishme kriminale ’Ndrangheta, renditet aktualisht në vendin e shtatë të grupit C në Serinë C, me pesë pikë nga katër ndeshje. Klubi ka luajtur në Serinë A për dy sezone radhazi rreth dhjetë vite më parë dhe përsëri në sezonin 2020-21.
Vendimi i gjykatës parashikon që klubi të vazhdojë aktivitetin sportiv, por nën mbikëqyrjen e administratorëve të caktuar nga gjykata. Autoritetet theksuan se klubi vetë nuk është nën hetim penal.
Në një deklaratë zyrtare, FC Crotone u shpreh se do të bashkëpunojë ngushtë me administratorët gjyqësorë “për të vazhduar aktivitetin në interesin më të mirë të klubit, tifozëve dhe sportit në përgjithësi”.
Klubi sqaroi gjithashtu se vendimi i gjykatës “nuk sugjeron aspak bashkëpunim apo përfshirje nga ana e aksionerëve, drejtuesve apo bashkëpunëtorëve të tij”.
Sipas prokurorisë së Katanzaros, gjatë dekadës së fundit Crotone ka qenë, “drejtpërdrejt ose tërthorazi, nën kushte intimidimi dhe nënshtrimi nga anëtarë të klaneve lokale të ’Ndrangheta-s”. Hetimet kanë zbuluar se grupet kriminale kishin depërtuar kryesisht në shërbimet e sigurisë dhe biletarisë së klubit.
Administrimi gjyqësor synon të rikthejë veprimtarinë ekonomike të Crotone-s në një drejtim të ligjshëm, thanë autoritetet. Infiltrimi mafioz në futbollin italian, sidomos në bizneset fitimprurëse të biletave dhe shitjeve të suvenireve, është një fenomen i njohur, me hetime të fundit që kanë përfshirë edhe grupet ultras të klubeve të mëdha si Inter dhe Milan.
