Nga Basir Çollaku
Antimafia italiane dhe Guardia di Finanza, kryen një hetim të thelluar nga viti 2020, për një dosje kriminale, “Profili i ulët” me trafik droge, pastrim parash, mashtrime e evazion, ku i pandehur ishte edhe Henrik Baçi, biznesmeni shumë tendermarrës në Shqipëri, pjesë e bandës.
Ai u dënua me vendim të formës së prerë me 7 vite burg. Nga e hëna, ai rezulton person në kërkim ndërkombëtar, ndonëse miqësitë e tij, sipas përgjimeve të dala gjatë procesit gjyqsor, janë me kryebashkiakun e Tiranës, Erion Veliaj dhe kryeministrin, Edi Rama. Pala italiane ka sjellë shumë fashikuj hetimorë në Strukturën e Posaçme dhe aty është regjistruar një procedim penal.
Ndërkohë që të dyshuarit dhe akuzuarit e antimafies, merrnin tendera e gradoheshin në detyra në Tiranë, Erion Veliaj është në prag të një mase të re sigurie, pas një kontrolli banesash dhe të bizneseve të tij e bashkëshortes Xoxa, familjarëve të tjerë e miqve të çiftit bashkiak. Apeli antimafies në dosjen e kësaj bande të Ndranghetas, në pjesën shqiptare, flet për tre grataçela në Tiranë, në të cilat do të investoheshin 180 milionë euro, për investime në bregdet, ku janë qindra milionë euro të tjera të hedhura, për tendera në spitale e biznese të tjera, ku ka vërshuar paraja lumë.
Natyrisht për të shkuar deri këtu, nuk mund të ndodh pa firmën e Edi Ramës dhe Erion Veliajt, pa llogaritur vartësit e përgatitjes së shkresave të duhura. Në një qytet ku janë dhenë mbi 10 milionë metër katror ndërtim, miliardat e hedhura janë katrahurë vrasëse. Hetimet për inceneratorin e Tiranës, janë në tejkalim afatesh dhe truku ligjor la sërish jashtë vendimmarrjes emra të botës së pushtetit, qeverisë, politikës e medies. Rindërtimi nga tërmeti i pesë viteve më pare, po përlan dhjetëra milionë euro të shpërndara në muajt e fundit, një tjetër abuzim marramendës.
Orkestra shqiptare e pushtetit, me dirigjent Ramën e donator Veliajn, kërkon të ndërrojë melodinë që u dëgjua në sallën e gjyqit në apel në Katanzaro, ku vendimi me dënime mbi tre shekuj burg e miliona euro sekuestrrime, u bë formë e prerë. Në ministrinë e Shëndetësisë, në kohën e Pandemisë, në Ministrinë e Jashtme kur Rama mbante dy poste, me largimin e Cakajt, në Bashkinë e Tiranës e kryeministri, janë së paku këto institucione, të cilat duhet të ishin përballur me veprimet hetimore të Strukturës së Posaçme.
Ky është mosveprim në harkun e 4 viteve. Vendimi Italian, natyrisht kërkon minuta për tu përcjellë në Prokurorinë e Përgjithshme nëpërmjet Ministrisë së Drejtësisë, në formën e kërkuar nga ligji. A mundet SPAK të zbulojë tre kullat e resortet dhe të vendosë sekuestro? Natyrisht, meqë antimafia ia ka lehtësuar punën, nuk e ka aspak të vështirë, gjithnjë nëse pavarësia takohet me të.
Gjithashtu, orkestra e mbytur nga hallet e Ndranghetës në Shqipëri, ka halle ministrash të tjerë, si Balla, Balluku, ku deklarime e materiale në prokurori janë shtuar, apo tekste të rënda të sky-enchro dhe mesazhe amerikane, shkaktojnë tërmet më të rëndë se ai 2019-tës në PS e qeveri. Ndaj luajnë me fatkeqësinë e artistes Simaku, për të cilën u kujtuan në valën e zjarrit të dosjeve, kur halli i saj ishte aty prej 20 vitesh.
Mediet kombëtare dhe disa staelitë të tyre, kanë luajtur të njëjtën muzikë, duke prodhuar një krizë false në dis-harmoni me ngjarjet e rënda të drejtësisë dhe ekonomisë në Shqipëri. Natyrisht, Mafia ka aksione gjithandej e inceneratorët lindin shpesh. Skaletat e propogandës në duart e Kryeministrit për të blerë ca javë kohë. Asgjë më tepër. Çfarë është nisur, nuk ndalet. Do të jenë të pandehur doemosdo. Në janar 2025, mbushen tre vjet, kur SPAK ka regjistruar çështjen Rama-McGonigal, ku është shtuar padia e opozitës për Ramën, Ballën, Gjiknurin e Veliajn.. Orkestra gati…!
