Një ngjarje tragjike ka tronditur Italinë, ku një 14-vjeçar, i identifikuar si Paolo, i dha fund jetës një ditë para se të rifillonte shkolla.
Autoritetet italiane kanë hapur hetim për nxitje në vetëvrasje, ndërsa Ministria e Arsimit ka urdhëruar inspektime në shkollat që djali kishte ndjekur. Dyshohet se Paolo ishte viktimë e bullizmit të vazhdueshëm nga bashkëmoshatarët e tij.
Ngacmimet kishin nisur që në shkollën fillore. Për shkak të flokëve të gjatë bjonde, shokët e tallnin duke e quajtur “Paoletta” ose “Nino D’Angelo”. Shpeshherë ai ishte i izoluar dhe në një rast, një nxënës kishte futur edhe thikë në klasë, por incidenti u minimizua, ndërsa ankesat e familjes mbetën të papërfillura.
Prokuroria e Cassinos tashmë po heton rastin, ndërsa ministri i Arsimit, Giuseppe Valditara, ka kontaktuar familjen dhe ka premtuar masa konkrete.
Këngëtari napolitan Nino D’Angelo, emri i të cilit u përdor për ta tallur të miturin, reagoi publikisht: “Na fal Paolo, nëse nuk ishim aty për ty. Më vjen keq që të thirrën me emrin tim.”
Ndërkohë, vëllai i tij, Ivan, përmes një letre drejtuar institucioneve, kërkoi drejtësi dhe theksoi se bullizmi është një plagë e rëndë, e cila, kur neglizhohet, mund të marrë jetë njerëzish.
