Pas muajsh tensionesh mbi të ardhmen e TikTok në Shtetet e Bashkuara, Uashingtoni dhe Pekini kanë arritur një “marrëveshje kornizë” për platformën kineze të mediave sociale.
Sekretari i Thesarit amerikan, Scott Bessent, njoftoi nga Madridi se palët kanë rënë dakord mbi kushtet tregtare për çështjen e TikTok, edhe pse nuk dha detaje konkrete për mekanizmat e marrëveshjes. Ai theksoi se objektivi i SHBA-së ishte garantimi i një mjedisi të drejtë investimi për kompanitë kineze, por duke vënë në plan të parë sigurinë kombëtare amerikane.
Ky zhvillim u përshëndet nga presidenti Donald Trump, i cili e quajti “një marrëveshje të shkëlqyer tregtare”. Në një postim në platformën e tij “Truth”, Trump shkroi: “Është arritur një marrëveshje për një kompani të caktuar që të rinjtë në vendin tonë kanë qenë të dëshpëruar për ta shpëtuar. Ata do të jenë shumë të lumtur.”
Takimet mes delegacioneve amerikane dhe kineze po zhvillohen në Madrid dhe do të zgjasin deri të mërkurën, që përkon me afatin e fundit për TikTok për të gjetur një blerës ose përballur me ndalim në SHBA. Trump ka paralajmëruar gjithashtu një takim të drejtpërdrejtë me presidentin kinez Xi Jinping më 19 shtator, për të çuar përpara dialogun tregtar mes dy superfuqive.
Kjo është seanca e katërt e negociatave në tokën evropiane brenda katër muajve, pas marrëveshjes së korrikut në Stokholm që uli ndjeshëm tarifat reciproke dhe hapi rrugën për rikthimin e eksporteve kineze të metaleve të rralla drejt SHBA-së. Megjithatë, Trump ka vendosur të zgjasë deri më 10 nëntor tarifat mesatare prej 55% mbi mallrat kineze, duke e mbajtur presionin tregtar aktiv.
