Kryedemokrati Sali Berisha ka hedhur akuza të forta ndaj zëvendëskryeministres dhe ministres së Infrastrukturës, Belinda Balluku, duke e cilësuar si të përfshirë në “vjedhje të dokumentuara me qindra miliona euro”, sipas tij, në projektin e tunelit të Llogarasë dhe në sektorin energjetik.
Gjatë një deklarate për mediat, Berisha përdori një ton të ashpër ndaj Ballukut, duke e akuzuar për afera të rënda korruptive.
Berisha shtoi se sipas tij, abuzimet më të mëdha janë kryer në sektorin e energjisë, ku pavarësisht krijimit të bursës për transaksione energjetike, çmimet janë manipuluar në mënyrë që të përfitojnë kompani të lidhura me Ballukun.
“Nuk ka patur një hajdute me çizme si Lubi Balluku. Lubi Balluku është e akuzuar me dokumente për vjedhje të qindra miliona euro me tunelin e Llogarasë, prandaj në popull e thërrasin si Lubi Tuneli, me tigrat e saj në Vlorë, por qytetarët shqiptarë të mos harrojnë se vjedhjet më të mëdha janë në fushën e energjisë, ku ajo edhe pas krijimit të bursës për transaksione energjitike, tejkalon në cdo rast bursën për hir të xhepave të saj. Janë faktuar tashme, jo një por në mënyrë të përsëritur rastet, kur energjia u është shitur kompanive të lidhura me Lubinë me 40 euro dhe këta e kanë shitur në treg me 140 euro duke i ndarë paratë me të.”- tha Berisha.
