Ka nisur këtë të hënë gjyqi në themel për dosjen e privatizimit të ish-kompleksit sportiv “Partizani”.
Të pandehur janë marrë kreu i PD-së, Sali Berisha, i akuzuar nga SPAK për korrupsion pasiv, si dhe për të njëjtën vepër penale edhe dhëndri i tij, Jamarbër Malltezi, i cili akuzohet po ashtu për përfitimin e të ardhurave në vlerën e 5.4 milionë eurove nga një biznes ndërtimi, falë vendimeve të qeverisë të marra nga vjehrri i tij.
Në të njëjtën çështje, SPAK akuzon për korrupsion aktiv biznesmenin e ndërtimit, Fatmir Bektashi, ndërsa Xhimi Begeja dhe Andia Pustina akuzohen për pastrim parash. Si të pandehur në këtë çështje për akuzën e pastrimit të parave janë edhe shoqëritë Studio Pustina sh.p.k., Homeplan sh.p.k. dhe Kontakt sh.p.k.
Në seancën e sotme, i vetmi nga të pandehurit, i cili është i pranishëm në sallën e gjyqit është Jamarbër Malltezi, ndërsa të tjerë përfaqësohen nga avokatët e tyre.
“Tani, e kishe këtu zotin Genc Gjokutaj dhe unë nuk e kam zakon të flas në emër të avoketërve të mi. Prandaj mundësisht ç’të jetë pyetje për avokatin, të ja drejtoni avokatit. Kurse unë do të veproj në përputhje me këshillat e avoketëve. Ky është qëndrimi im. Kur avoketërit të më këshillojnë që unë të jem i pranishëm në sallën e gjyqit, do të shkoj pa asnjë hezitim. Por ka një radhë atje, ka një radhë pune dhe janë gjithë ato dhe ata kur e gjykojnë të arsyeshme unë do të shkoj.” – tha Berisha për gazetarët kur u pyet se pse nuk ishte i pranishëm në gjyq.
Avokati i Sali Berishës, Genc Gjokutaj tha se do të kërkojnë pavlefshmërinë, pasi sipas tij, SPAK ka tejkaluar kompetencën e saj kushtetuese, duke u bazuar në opinione.
“Ne kërkojmë pavlefshmëri absolute për marrjen si të pandehur dhe të njoftimit të akuzës për shtetasin Sali Berisha. Nga të dhënat e njoftimit nga SPAK, konstatohet se Berisha, në cilësinë e tij si kryeministër, ka kryer veprime konkrete, duke marrë akte ligjore dhe nënligjore me qëllim përfitimin e familjeve pronare, ku përfitues ishte edhe Jamarbër Malltezi. Prokuroria ka tejkaluar kompetencën e saj kushtetuese, duke u bazuar në opinione. Ngritja e akuzës nuk është kryer në përputhje me ligjin.” – tha Gjokutaj.
Trupa gjykuese për këtë dosje përbëhet nga gjyqtarët Elsa Ulliri, Bib Ndreca dhe Rudina Palloi.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
Si Berisha ashtu edhe Malltezi i kanë kundërshtuar akuzat dhe e kanë cilësuar hetimin si të orkestruar nga kryeministri Edi Rama.
Të pandehurit e dosjes “Partizani”:
- Sali Berisha, ish kryeministër – akuzohet për “Korrupsionit pasiv të funksionarëve të lartë shtetërore ose të zgjedhurve vendorë”, kryer në bashkëpunim.
- Jamarbër Malltezi – dhëndri i ish-kryeministrit – akuzohet për “Korrupsioni pasiv të funksionarëve të lartë shtetërore ose të zgjedhurve vendorë”, kryer në bashkëpunim dhe për “Pastrimit të produkteve të veprës penale ose veprimtarisë kriminale”.
- Fatmir Bektashi – Ndërtuesi akuzohet “Korrupsionit aktiv të funksionarëve të lartë shtetërorë” dhe “Pastrim parash”
- Xhimi Begeja – Trashëgimtar i tokës dhe bashkëpronar i “Homeplan” akuzohet për “Pastrim Parash”
- Andia Pustina – Financierja që kryente të gjitha operacionet financiare dhe ligjore të “Homeplan sh.p.k” – akuzohet për “Pastrim Parash”
