Pavarësisht faktit se ditën e sotme u deklarua që Bashkia Tiranë do të jetë në zgjedhje të pjesshme për shkak të arrestimit të kryetarit të saj, Erion Veliajt, ende ka pikëpyetje mbi mënyrën se si duhej të ishte vepruar që më herët.
Ish-kryetari i Komisionit Qendror të Zgjedhjeve, Kristaq Kume, i ftuar në Klan News, ka sqaruar mbi aspektin ligjor se si duhej të ishte vepruar me Bashkinë e Tiranës që pas arrestimit të Veliajt në shkurt të këtij viti.
Siç sqaron Kume, sipas ligjit për qeverisjen vendore, nëse kryetari i Bashkisë nuk paraqitet në detyrë për një periudhë prej tre muajsh rresht, Këshilli Bashkiak duhet të mblidhet. Në këtë mbledhje, Këshilli duhet të propozojë për heqjen e mandatit të kryebashkiakut, por padyshim nuk mund të marrë vendim për shkarkimin e tij. Më pas, ky propozim, i kalon kryeministrit. Ky i fundit, vendos nëse kryebashkiakut në mungesë i hiqet ose jo mandate. Në rast se vendoset për shkarkimin e kryebashkiakut, kreu i qeverisë komunikon me Presidentin e Republikës për zgjedhje të pjesshme për këtë bashki.
“Ligji për qeverisjen vendore e shpreh fare qartë dhe nuk lë hapësira për të interpretuar, kur në rastet e ndërprerjes së mandatit që parashikon ky ligj, rastin kur i zgjedhuri, pra kryetari i bashkisë nuk paraqitet në detyrë për një periudhë tre-mujore, në vazhdim. Nuk zihet me gojë fare arsyeja. Nëse ai nuk hap derën tre muaj rresht, menjëherë pas kësaj ky ligj i referohet Këshillit Bashkiak dhe i thotë mblidhu e merr vendim për të propozuar jo për të shkarkuar mandatin, por për të propozuar ndërprerjen e mandatit të atij që nuk është paraqitur. Këshilli Bashkiak duhet të mblidhet të vendosë për këtë gjë, pastaj se çfarë do ndodh më tej, është e drejta e kryetarit të qeverisë. Është ai që duhet të vendosë se do ndërpresë mandatin e zotit Veliaj apo jo, e sipas rastit nëse ndërpret, të njoftojë Presidentin e Republikës për të bërë zgjedhje të parakohshme”, tha ai.
Por edhe pse ligji është shumë i qartë, nuk pati një mbledhje të tillë nga Këshilli Bashkiak i Tiranës. Kume shprehet se Këshilli Bashkiak nuk e kreu detyrën e tij, e se siç shprehet ish-kreu i KQZ-së, kjo gjë nuk është normale. Kume shprehet se nuk ka pasur asnjë përfitim politik nga ky veprim.
“Kjo rrugë nuk u ndoq. Unë nuk e kuptoj se përse nuk u ndoq kjo rrugë, pse mazhoranca nuk pranoi të ndiqte këtë rrugë. Ligji e thotë hapur fare. Nuk të thotë se nëse ti nuk vjen se je për këtë aryse, të presim, etj. Ligji thotë se nëse kryetari i bashkisë nuk paraqitet në detyrë tre muaj rresht, këhsilli bashkiak duhe të vendoset në lëvizje, për t’ia dërguar kryeministrit. Është kryeministri që e merr këtë vendim. Këshilli bashkiak nuk e kreu këtë detyrë. Kjo nuk është fare normale për mua. Nuk e kuptoj se çfarë arsye ka pasur e çfarë përfitimi politk ka pasur nga ky veprim”, tha ai.
