Kushtet e paqëndrueshme atmosferike janë rikthyer në vendin tonë. Që prej paradites e deri në orët e vona të pasdites, Shqipëria pritet të jetë nën ndikimin e vranësirave dhe reshjeve të shiut, të cilat herë pas here do të shoqërohen me rrebeshe dhe stuhi të forta. Gjatë mbrëmjes pritet përmirësim i motit.
Era do të fryjë e lehtë dhe mesatare, me shpejtësi deri në 16 km/h nga veriu, duke krijuar dallgëzim 3-4 ballë në det.
Ndërkohë, reshjet e dendura të shiut kanë shkaktuar probleme në disa qytete bregdetare. Në Vlorë, që në orët e para të mëngjesit, rreth orës 05:25, u regjistruan përmbytje në disa zona. Lagjja “Pavarësia 3”, zona pranë stadiumit “Flamurtari”, Bulevardi Kryesor dhe rruga “Gjergj Arianiti” u mbuluan nga uji. Nën ujë mbetën gjithashtu edhe lagjet “28 Nëntori”, “Pavarësia” dhe “Kushtrimi”, ku ujërat vijojnë të jenë të pranishme në rrugë.
Probleme u raportuan edhe në Durrës, ku reshjet e dendura për disa orë me radhë krijuan prani uji në kryqëzimin pranë kompleksit të shkollave të mesme dhe në Shëtitoren “Taulantia”, e njohur ndryshe si rruga që të çon drejt Currilave.
