Me rastin e Ditës së Shenjtërimit të Nënë Terezës, 5 shtator, ambasada e ShBA-ve në Tiranë ka publikuar mesazhin e presidentit amerikan Donald Trump.
“Nënë Tereza u dha ushqim të uriturve, strehë të pastrehëve dhe arsim atyre që kishin nevojë. Ajo përfaqësonte më të mirën te secili prej nesh”, ka thënë Trump, duke vlerësuar veprën e papërsëritshme të shenjtores shqiptare.
Edhe Delegacioni i Bashkimit Europian në Tiranë e kujton Nënë Terezën, duke theksuar se ajo është një figurë që mishëroi dhembshurinë dhe humanizmin në çdo hap të jetës së saj.
“Ajo mbetet një krenari e madhe për Shqipërinë dhe një frymëzim i pashtershëm për brezat kudo në botë”, thuhet në mesazhin e publikuar nga BE-ja.
Delegacioni citon gjithashtu një mesazh të Nënë Terezës:
“Unë mund të bëj gjëra që ju nuk mundeni, ju mund të bëni gjëra që unë nuk mundem; së bashku mund të bëjmë gjëra të mëdha.”
