Diplomati Agim Nesho ka deklaruar se dosja McGonigal ka qenë tema kryesore e diskutimit në takimin që drejtuesi i SPAK, Altin Dumani, zhvilloi në Departamentin Amerikan të Shtetit (DASH).
Në një intervistë në emisionin “Çim Peka Live” në Syri TV, Nesho tha se vizita e kreut të SPAK-ut në SHBA nuk është rastësore, pasi ky takim ishte planifikuar prej kohësh dhe ka pasur prapaskena të rëndësishme diplomatike.
“Takimet në DASH nuk ndodhin kurrë rastësisht. Planifikime të tilla bëhen me kohë dhe kanë gjithmonë mesazhet e tyre politike. Në këtë rast, çështja McGonigal ka qenë kryefjala e diskutimit”, tha Nesho.
Sipas tij, një nga shqetësimet kryesore të ngritura nga pala amerikane lidhet me përdorimin e politikës së SHBA kundër opozitës shqiptare. Ai theksoi se informacionet nga media dhe burime diplomatike tregojnë se amerikanët kanë gjithnjë e më shumë kritika ndaj “regjimit të korruptuar dhe të inkriminuar në Shqipëri, i cili lidhet edhe me krimin e organizuar”.
“Po bëhen të qarta prapaskenat se goditja ndaj liderit të opozitës ka qenë rezultat i lobimit të hapur në DASH nga grupimi i Ramës. Kjo është arsyeja pse amerikanët po përpiqen të korrigjojnë situatën, duke dhënë sinjale se nuk janë dakord me atë që po ndodh në Shqipëri”, shtoi Nesho.
Ai nënvizoi gjithashtu se takimet e Dumanit në Departamentin e Drejtësisë pasojnë mesazhin politik të DASH, duke kaluar në një fazë të bashkëpunimit institucional.
“Amerikanët janë shumë të kujdesshëm në diplomacinë e tyre. Kur organizojnë dhe publikojnë takime të tilla, është e qartë që ka një mesazh. Dhe ky mesazh është se çështja McGonigal dhe korrupsioni i lidhur me qeverinë shqiptare mbeten në fokus të madh të Uashingtonit”, përfundoi diplomati.
