Një 26-vjeçar shqiptar, punonjës sezonal në një hotel në ishullin turistik të Rodosit, është arrestuar nga policia greke pas denoncimit të një striptisteje 36-vjeçare, e cila pretendon se ai e ka përdhunuar.
Sipas mediave greke, ngjarja ka ndodhur në zonën e Falirakit, Rodos. Striptistja ka rrëfyer se u njoh me të riun nëpërmjet një aplikacioni të rrjeteve sociale dhe se kishin mbajtur komunikim të shpeshtë gjatë vitit të fundit. Ajo thotë se pranoi një takim privat me të, por pasi shkuan në godinën ku banonin punëtorët sezonalë, shqiptari u bë i dhunshëm dhe abuzoi seksualisht me të, pavarësisht kundërshtimeve të saj.
E reja ka dëshmuar se gjatë ngjarjes pësoi edhe një atak paniku. Sipas saj, të nesërmen i riu e kërkoi sërish dhe madje u shfaq pranë vendit të saj të punës, duke e bërë atë të ndihej e kërcënuar, ndaj dhe vendosi të bënte denoncimin.
Policia greke e arrestoi shqiptarin në Departamentin e Policisë së Arkangelos. Pas marrjes në pyetje për disa orë, ai u lirua nga prangat, por do të hetohet për akuzën e abuzimit seksual dhe çështja do të shkojë në gjykatë.
Në dëshminë e tij, i riu ka mohuar akuzat, duke këmbëngulur se marrëdhënia ishte me pëlqim të dyanshëm. Ai deklaroi se vajza kishte shkuar me dëshirë dhe se nuk kishte ushtruar dhunë ndaj saj. Madje, sipas tij, takimi i së nesërmes ishte vetëm për t’i çuar mëngjes dhe kafe, e jo për ta kërcënuar.
