Presidenti amerikan Donald Trump ka akuzuar filantropin miliarder George Soros dhe djalin e tij, Alex Soros, për përfshirje në protesta të dhunshme dhe ka kërkuar që të hetohen sipas ligjit federal RICO, që ndjek penalisht pjesëmarrësit në organizata kriminale, raporton CNN.
Në një postim në platformën e tij Truth Social, Trump shkroi: “George Soros dhe djali i tij i mrekullueshëm nga e majta radikale duhet të ndiqen penalisht sipas ligjit RICO për mbështetjen e protestave të dhunshme, dhe shumë më tepër”.
Deklaratat vijnë në një kohë kur administrata e tij po ndjek penalisht disa nga kundërshtarët politikë. Trump përdori situatën për të justifikuar vendimin për të dërguar Trupat e Gardës Kombëtare dhe Marinsat në Los Anxhelos, një qytet i drejtuar nga demokratët, ku protestat kanë vazhduar prej disa javësh.
Më herët, Trump kishte akuzuar Sorosin se kishte ndikim të drejtpërdrejtë mbi prokurorin publik që ngriti akuzat kundër tij në vitin 2024 lidhur me pagesat për të fshehur marrëdhënien me një aktore filmash për të rritur.
George Soros, 95 vjeç, ka qenë prej vitesh objekt sulmesh nga e djathta në SHBA dhe Evropë për mbështetjen e kauzave progresiste dhe Partisë Demokratike. Në vitin 2023, ai i dorëzoi drejtimin e fondacionit “Open Society Foundations” djalit të tij, Alex Soros, i cili mbështeti fuqishëm Kamala Harris në zgjedhjet presidenciale të 2024-ës.
Pak para se të largohej nga detyra, ish-Presidenti Joe Biden i dha George Sorosit Medaljen Presidenciale të Lirisë për kontributin e tij në projekte që forcojnë demokracinë, të drejtat e njeriut, arsimin dhe drejtësinë sociale në mbarë botën.
