Nga 15 shtatori, drejtuesit e mjeteve që do të përdorin tunelin e Llogarasë do të paguajnë tarifën prej 10 eurosh vajtje-ardhje. Deri në këtë datë, qarkullimi do të vijojë pa pagesë, ashtu siç ishte parashikuar për sezonin turistik.
Menaxhimi i pagesave do të kryhet nga Enti Kombëtar i Operimit Rrugor, një shoqëri aksionere me kapital shtetëror, e cila do të administrojë portat automatike, sistemin e tarifimit, shpërndarjen e biletave dhe abonetë mujore. Aktualisht, ky është segmenti i tretë rrugor në vend ku aplikohet pagesë, pas rrugëve Milot–Morinë dhe Thumanë–Kashar.
Ndërtimi i tunelit të Llogarasë është shoqëruar me akuza për korrupsion. Opozita ka denoncuar se në projektin e kësaj vepre ka patur abuzime deri në 50 milionë euro.
Në gusht 2024, Gazment Bardhi depozitoi në SPAK një kallëzim për aferën e “Tunelit të Llogarasë”, ndërsa në prill 2025 Prokuroria e Posaçme nisi hetimet, duke sekuestruar dokumentet e kompanisë “Hill International NV”.
