Një ngjarje e rëndë është shënuar pasditen e kësaj të mërkure në lokalet e kompleksit ‘Valamar’ në Hamallaj të Durrësit, ku një i ri mbeti i plagosur rëndë pasi u qëllua me dy plumba.
Burime për Boldnews.al, bëjnë me dije se shkaku i sherrit mendohet që të jetë për parkimin e automjeteve.
U mësua se Liridon Rata, pas një debati për motive të dobëta në parkimin e lokaleve të kompleksi ‘Valamar’, është qëlluar me armë zjarri nga 44-vjeçari Altin Lekgegaj.
Pas krimit autori 44 vjeçar u largua nga vendi i ngjarjes me një automjet “Toyota Yaris”, ndërsa i plagosuri ndodhet në spitalin e Durrësit në gjëndje të rëndë për jetën.
U bë me dije se 28 vjeçari Liridon Rada ka akoma plumbin në brinjë dhe nuk mund të transportohet drejt Traumës.
Ndërkohë Boldnews.al, ka siguruar edhe pamjet nga vendngjarja e krimit.
Sipas denoncuesit për Boldnews.al, autori Altin Lekgegaj dhe i plagosuri Liridon Rata, ishin klientë të lokaleve në ‘Valamar‘.
Kjo ngjarje ngre pikëpyetje për sigurinë e klientëve një prej komplekseve më luksozë në plazhet e detit Adriatik.
Kujtojmë që më herët, Boldnews.al, ka denoncuar disa raste që vënë në pikëpyetje sigurinë e kompleksit ‘Valamar‘, e cila ruhet 24 orë nga kompania private “ARB Security”.
Boldnews.al, raportoi se disa ditë më parë, një vilë e kyçur të një emigranti në kompleksin luksoz “Valamar”, në Gjirin e Lalzit, ra pre e një grabitjeje spektakolare.
Po ashtu një tjetër vilë është tentuar që të vidhet nga një hajdut dhe sistemi i sigurisë së ARB Security ka dështur.
Sipas denoncuesit për Boldnews.al, hajduti është futur ne shtëpi edhe pse ka pasur njerëz, duke vënë në pikëpyetje sistemin e sigurisë së vilave dhe patrullimet që bën ‘ARB Security’ në kompleks. Ai është zbuluar nga të pranishmit dhe më pas është larguar me vrap nga vetrat.
Çfarë thotë policia për plagosjen sot?
Pak pasi u raportuan të shtëna me armë zjarri në Hamallaj, policia reagoi për plagosjen e 28-vjeçarit Liridon Rata.
Policia bëri me dije se rreth orës 16:40, në Hamallaj, dyshohet se gjatë një konflikti për motive të dobëta, një 44-vjeçari Altin Lekëgegaj, ka plagosur me armë zjarri 28-vjeçarin Liridon Rata
Gjithashtu në njoftim theksohet se i riu që mbeti i plagosur ndodhet në gjendje të rëndë shëndetësore.
Njoftimi i plotë i policisë:
U konfliktuan për motive të dobëta, plagosi me armë zjarri 28-vjeçarin, Policia identifikon dhe shpall në kërkim 44-vjeçarin
Shërbimet e Policisë janë vënë në ndjekje të tij.
Rreth orës 16:40, në Hamallaj, dyshohet se gjatë një konflikti për motive të dobëta, shtetasi A. L., 44 vjeç, ka plagosur me armë zjarri pistoletë shtetasin L. R., 28 vjeç, i cili ndodhet në spital, në gjendje kritike për jetën.
Shërbimet e Policisë, sapo kanë marrë njoftimin, kanë shkuar menjëherë në vendngjarje dhe, falë veprimeve të shpejta, kanë identifikuar autorin dhe janë vënë në ndjekje të tij.
Shërbimet e Policisë vijojnë kontrollet në zonë dhe në ambiente të ndryshme, ku dyshohet se mund të jetë fshehur 44-vjeçari.
Grupi hetimor vijon punën për zbardhjen dhe dokumentimin e plotë të rrethanave të ngjarjes.
Lexo edhe:
Lexo edhe:
Një vjedhje që duhet mbuluar, kë përfshin grabitja e një vile tek kompleksi “Valamar”
