Kolegji Zgjedhor ka pushuar çështjen e deputetes së Partisë Demokratike, Andia Ulliri, e cila kërkoi t’i jepet mandati i deputetit që aktualisht zotërohet nga Arjan Ndoja.
Gjatë seancës, Ulliri i drejtoi gjykatës kërkesën për rrëzimin e vendimit të Komisionit Qendror të Zgjedhjeve (KQZ), që i dha mandatin Ndojas. Ajo u përfaqësua nga avokati Indrit Sefa, ndërsa Arjan Ndoja nuk ishte prezent dhe u përfaqësua nga avokati Rexhë Margjeka.
Avokati i Ndojas kërkoi që Ulliri të mos legjitimohej si palë ankimuese. Pas shqyrtimit të kërkesës dhe dëgjimit të palëve, trupi gjykues vendosi pushimin e çështjes, duke konkluduar se Ulliri nuk legjitimohet për t’i drejtuar gjykatës këtë kërkesë.
Andia Ulliri kishte argumentuar se mandati i Ndojas i takonte për shkak të kuotës gjinore. Ajo kishte ankimuar më parë vendimet e Komisionit të Ankimimeve dhe Sanksioneve dhe të kryekomisionerit Ilirjan Celibashi, të cilët rrëzuan kërkesat e saj, duke argumentuar se listat e hapura dhe të mbyllura funksionojnë të ndara.
Ulliri kandidoi në listat e Partisë Demokratike – Aleanca për Shqipërinë Madhështore në qarkun e Durrësit.
