Izraeli i rikthehet projekteve të mëdha të kolonizimit të territoreve në Bregun Perëndimor, teksa shtohen vendet që planifikojnë njohjen e shtetit të Palestinës.
Ministri izraelit i financave, Bezalel Smotriç, nga radhët e radikalëve të djathtë, njoftoi këtë të enjte vënien në zbatim të planit për ndërtimin e më shumë se 3 mijë shtëpive në territoret e Bregut Perëndimor, përreth Jerusalemit Lindor. I ashtuquajturi “projekti E1” shkëput lidhjen territoriale mes vendbanimeve palestineze në Jerusalemin Lindor dhe pjesës tjetër të Bregut Perëndimor.
“Kjo varros idenë e një shteti palestinez, pasi nuk ka asgjë dhe askënd për të njohur. Pas dekadash të tëra presioni dhe ngrirjeve ndërkombëtare, po thyejmë konventat dhe po lidhim Jeruzalemin me Maale Adumimin.”
Autoriteti palestinez që ka nën kontroll Bregun Perëndimor e quajti vendimin vazhdim të gjenocidit dhe krimeve kundër palestinezëve nga qeveria izraelite. Plani u dënua edhe nga Jordania dhe vende të tjera të rajonit.
Hapi hidhet teksa ushtria izraelite po përgatitet të zbatojë planin e pushtimit të qytetit të Gazës dhe krejt Rripit, territorit tjetër jugperëndimor palestinez që kontrollohet nga Hamasi.
Franca, Britania e Madhe, Kanadaja dhe Australia kanë në plan ta njohin shtetin palestinez në shtator.
