Policia e Vlorës dhe Himarës duket se ka identifikuar tre autorët e zjarreve në Lukovë, Bolenë dhe Tragjas, ku njëri prej tyre është arrestuar, ndërsa dy të tjerë janë proceduar penalisht në gjendje të lirë.
Më konkretisht, raportohet se është vënë në pranga shtetasi B. A., 43 vjeç, banues në fshatin Lukovë, i akuzuar për veprat penale “Shkatërrimi nga pakujdesia me zjarr i pyjeve dhe i mjedisit pyjor” dhe “Shkatërrimi i pronës nga pakujdesia”,
“Nga veprimet hetimore dyshohet se ky shtetas, më datë 10.08.2025, në vendin e quajtur “Lapardha”, pasi ka konsumuar cigare, e ka hedhur në tokë dhe nga pakujdesia ka shkaktuar zjarr, ku si pasojë e përhapjes së flakëve janë djegur 30 rrënjë ullinj, si edhe një sipërfaqe toke me shkurre dhe ferra.” – thuhet në njoftimin e autoriteteve.
Ndërkohë, është proceduar penalisht shtetasi E. T., 34 vjeç, banues në fshatin Bolenë, i akuzuar për veprën penale “Shkatërrimi nga pakujdesia me zjarr i pyjeve dhe i mjedisit pyjor”
“Ky shtetas dyshohet se më datë 09.08.2025, në afërsi të varrezave të fshatit Bolenë, ka ndezur zjarr për pastrimin e kullotës që kishte në përdorim dhe si pasojë e përhapjes së flakëve është djegur një sipërfaqe me shkurre, ferra dhe disa pisha.” – njoftojnë autoritetet.
Po ashtu është proceduar penalisht edhe shtetasi G. Gj., 58 vjeç, banues në fshatin Tragjas, i akuzuar për veprën penale “Shkatërrimi i pronës me zjarr”.
“Ky shtetas dyshohet se është autori i zjarrvënies së datës 08.08.2025, në fshatin Tragjas, ku u dogj një sipërfaqe me bimësi.” – thuhet në njoftim.
Materialet procedurale për këto raste i kanë kaluar Prokurorisë së Vlorës për veprime të mëtejshme.
