Avokatët e italianit Davide Pecorelli, i cili ndodhet i burgosur në Shqipëri për inskenimin e vdekjes së tij, i kanë drejtuar një letër ministrit të Jashtëm të Italisë, Antonio Tajani, si dhe Ambasadës Italiane në Tiranë, duke kërkuar ndërhyrje të menjëhershme për mbrojtjen e klientit të tyre dhe për garantimin e të drejtave themelore të njeriut gjatë qëndrimit të tij në paraburgim.
Në letrën e avokatëve Massimo Brazzi dhe Andrea Castori, theksohet domosdoshmëria që ndaj Pecorellit të zhvillohet një proces i drejtë dhe transparent përpara Gjykatës së Apelit në Tiranë, seanca e së cilës është caktuar për 18 shtator.
“Nevojiten masa të menjëhershme dhe të përshtatshme për të mbrojtur shtetasin italian Davide Pecorelli, duke siguruar që të drejtat e tij themelore të njeriut të rivendosen dhe garantohen. Ne gjithashtu kërkojmë që të bëhen përpjekje për të siguruar që një gjykim i drejtë të zhvillohet para Gjykatës së Apelit të Tiranës.” – shkruajnë avokatët e Pecorellit, në letrën e publikuar nga mediat italiane.
Në këtë apel zyrtar, përveç institucioneve diplomatike, janë përfshirë edhe dy përfaqësues të Partisë Demokratike italiane nga zona e Umbrisë, deputetja Anna Ascani dhe senatori Walter Verini, të cilëve u është përcjellë komunikimi për dijeni.
Avokatët e Pecorellit ankohen për kushtet në të cilat po mbahet klienti i tyre në burgun 313 në Tiranë. Sipas tyre, kushtet janë alarmante dhe të papranueshme. Ata citojnë se dhoma është vetëm 16 metra katrorë dhe në të mbahen tetë persona, me mungesë uji të rrjedhshëm.
Avokatët theksojnë se këto kushte jo vetëm që bien ndesh me standardet minimale evropiane, por përbëjnë rrezik real për trajtime çnjerëzore dhe degradues, në shkelje të nenit 3 të Konventës Evropiane për të Drejtat e Njeriut.
Gjithashtu, ata kujtojnë se gjatë procedurave të ekstradimit në Itali, në Gjykatën e Apelit të Peruxhës dhe më pas në Gjykatën e Lartë, është theksuar rreziku që kushtet në burgjet shqiptare të mos përmbushin standardet ndërkombëtare.
“Kushtet e Pecorellit janë të tmerrshme dhe në çdo rast jashtë përputhjes me raportet ndërkombëtare të cituara në vendimet e fazës juridiksionale të procedurave të ekstradimit. Prandaj është e nevojshme të shqyrtohen kushtet e ambienteve dhe trajtimi aktual i shkaktuar shtetasit italian të ndaluar, i cili ka të drejtë të marrë kushte dinjitoze dhe jo poshtëruese higjiene dhe jetese të përditshme, të cilat rrezikojnë seriozisht integritetin e tij fizik dhe mendor” – deklarojnë avokatët.
Rasti i tij ka tërhequr vëmendje edhe në opinionin publik në Itali. Influencuesi dhe sipërmarrësi italian i njohur me pseudonimin “Ale della Giusta” (Alessandro Della Giusta), ka publikuar së fundmi një video ku rrëfen historinë e ish-ndërmarrësit italian të përfshirë në një çështje komplekse ligjore në Shqipëri.
Siç dihet, në mars, Ministri i Drejtësisë Carlo Nordio dha ekstradimin e Pecorellit në Shqipëri bazuar në një urdhër arresti të lëshuar nga Gjykata e Pukës për krimet e mashtrimit (ose përvetësimit), përdhosjes së varreve, pengimit të drejtësisë dhe sekuestrimit të pronës me zjarrvënie, të kryera në janar 2021 në Shqipëri.
Ai është dënuar me 4 vite burgim nga Gjykata e Shkodrës. Më 8 maj, shtetasi italian nga San Giustino u transferua në burgun e Tiranës në pritje të një seance dëgjimore të Apelit, e cila do të mbahet më 18 shtator.
Pecorelli inskenoi vdekjen e tij në Janar të vitit 2021 në Pukë. Makina e tij u gjet e shkrumbuar në fshatin Gjegjan dhe brenda saj u gjetën edhe eshtra, duke bërë fillimisht që të mendohej se i përkisnin pikërisht biznesmenit. Por, ai u gjet i gjallë më 17 shtator 2021, në ishullin Montecristo (Itali). Ai u shpëtua në det, teksa lundronte me një varkë të vogël. E kur zbriti në tokë, u përball me urdhërarrestin e lëshuar nga gjykata shqiptare, më 2 tetor të 2022.
Rasti i Davide Pecorelli-t në fakt për shumë kohë ishte i mbushur me intrigë. Me origjinë nga San Giustino, sipërmarrësi në sektorin e produkteve të bukurisë dhe ish-arbitër, ishte vendosur në vendin tonë, aty ku fillimisht u mendua se ishte karbonizuar.
Më pas u rishfaq në Itali, në ujërat e detit Tirreno. Tregoi një histori si nëpër libra, duke thënë se kishte qenë në kërkim të një thesari. Në fakt, sipas asaj që doli në hetimet e autoriteteve shqiptare, në Janar të 2024-s, ai i vuri flakën makinës që kishte marrë me qira në Shqipëri dhe brenda saj vendosi eshtra për të simuluar vdekjen e tij. E gjithë ngjarja u inskenua për shkak të borxheve, të cilat e çuan të ndërmerrte këto veprime.
