Kryeministri Edi Rama ka shpallur me entuziazëm vazhdimin e projektit “Rilindja Urbane 2.0” në Durrës, duke njoftuar “çlirimin” e hapësirave publike dhe shtimin e sipërfaqeve të gjelbra.
Pas më shumë se 12 vitesh në pushtet, kreu i qeverisë thotë se tani është gati të vendosë “kufirin mes lirisë publike për të lëvizur dhe të drejtës për aktivitet ekonomik të subjekteve private”.
“Edhe në Durrës vazhdon çlirimi i hapësirave publike… gjithnjë në respekt të komunitetit,” shkroi Rama në rrjetet sociale.
Për kritikët, ky premtim i ri tingëllon si dikush që pas një dekade e gjysmë në timon, zbulon se frenat ekzistojnë. Ndërsa për qytetarët e Durrësit, mbetet për t’u parë nëse “çlirimi” do të thotë më shumë gjelbërim… apo thjesht ngjyrosje e trotuareve për fushatën e radhës.
Postimi i Ramës
Edhe në Durrës vazhdon çlirimi i hapësirave publike, për t’i hapur rrugën Rilindjes Urbane 2.0 që do të rrisë cilësinë e jetës komunitare dhe përmasën e gjelbër të qyteteve tona të mëdha, ku do të rivendoset qartë kufiri mes lirisë publike për të lëvizur e marrë frymë lirisht dhe të drejtës për aktivitet ekonomik të subjekteve private, gjithnjë në respekt të komuniteteve.
