Presidenti ukrainas Volodymyr Zelensky kërkoi që Evropa të marrë pjesë aktive në negociatat e paqes midis Ukrainës dhe Rusisë, pas njoftimit të Kremlinit se Donald Trump dhe Vladimir Putin do të zhvillojnë një takim në “ditët në vijim”.
“Lufta po zhvillohet në Evropë dhe Ukraina është pjesë integrale e saj. Prandaj, Evropa duhet të përfshihet në procesin e paqes për t’i dhënë fund luftës që vazhdon që nga viti 2022,” shkroi Zelensky në rrjetet sociale.
Në një zhvillim të ngjashëm, kancelari gjerman Friedrich Merz bisedoi me presidentin ukrainas për të diskutuar rreth zhvillimeve të fundit, pas takimit të të dërguarit special të SHBA-së, Steve Witkow, me presidentin rus Putin lidhur me konfliktin në Ukrainë.
Një zëdhënës i kancelarisë gjermane bëri me dije se Merz dhe Zelensky ranë dakord për mbajtjen e kontakteve të ngushta me partnerët evropianë dhe Shtetet e Bashkuara. Gjithashtu, kancelari Merz e siguroi Zelenskyn për mbështetjen e pandërprerë të Gjermanisë ndaj Ukrainës.
