Një shqiptar 29-vjeçar është arrestuar nga karabinierët në zonën e Aprilias, pranë rrugës Nettunense në Itali, pas një kontrolli të zakonshëm rrugor që përfundoi me përplasje dhe arrestim.
Sipas autoriteteve italiane, gjatë kontrollit të dokumenteve, i riu pranoi se nuk posedonte leje drejtimi. Menjëherë pas kësaj, ai tentoi të arratisej në këmbë duke i shpëtuar ndalimit, por u kap pas një ndjekjeje të shkurtër. Gjatë tentativës për të ikur, ai u përplas fizikisht me karabinierët, duke lënë njërin prej tyre të plagosur lehtë.
Pas identifikimit, rezultoi se shqiptari ishte subjekt i një urdhri arresti të lëshuar nga Gjykata e Romës në korrik të vitit të kaluar, për trafik të lëndëve narkotike, konkretisht kokainë. Ai ishte skeduar nga autoritetet italiane që prej vitit 2023.
Pas arrestimit, i riu është dërguar në burgun e Latinas, ndërsa automjeti me të cilin udhëtonte është sekuestruar administrativisht.
