Apple do të investojë edhe 100 miliardë dollarë të tjera për të zgjeruar operacionet e saj në Shtetet e Bashkuara, një njoftim që pritet të bëhet publik nga Presidenti Donald Trump gjatë ditës së mërkurë, sipas një zyrtari të Shtëpisë së Bardhë.
Ky angazhim i ri ekonomik vjen pas një zotimi të mëparshëm të Apple për të investuar 500 miliardë dollarë në SHBA në 4 vitet e ardhshme, në kuadër të përpjekjeve për të rritur praninë e saj prodhuese në vend. Kompania ka qenë e ekspozuar ndaj kostove të larta gjatë viteve të fundit për shkak të tarifave të vendosura nga administrata Trump ndaj produkteve të importuara nga Azia.
“Agjenda ekonomike ‘America First’ e Presidentit Trump ka siguruar triliona dollarë investime që mbështesin vendet e punës amerikane dhe forcojnë industrinë kombëtare,” deklaroi zëdhënësja e Shtëpisë së Bardhë, Taylor Rogers, për CNN. “Njoftimi i sotëm me Apple është një tjetër fitore për sektorin prodhues amerikan dhe një hap i rëndësishëm për rikthimin e prodhimit të komponentëve kritikë në SHBA, duke forcuar sigurinë ekonomike dhe kombëtare.”
Investimi i Apple do të përfshijë krijimin e një Programi Amerikan të Prodhimit, që ka për synim zhvendosjen e një pjese të konsiderueshme të zinxhirit të furnizimit të kompanisë nga Azia në SHBA.
Sipas Bloomberg, që raportoi i pari lajmin, ky hap i Apple përputhet me presionin në rritje nga Shtëpia e Bardhë ndaj gjigantëve të teknologjisë për të lokalizuar prodhimin në territorin amerikan. Administrata Trump ka kërkuar që produktet të mos montohen më në Kinë, Indi apo Vietnam, por në SHBA – një ndryshim që, sipas ekspertëve, përballet me sfida të mëdha si mungesa e fuqisë punëtore teknike dhe kostot më të larta të prodhimit.
Presidenti Trump ka qenë i drejtpërdrejtë në qëndrimin e tij ndaj Apple dhe Samsung, duke i paralajmëruar me tarifa të reja nëse nuk zhvendosin prodhimin e telefonave në SHBA. Në një postim në platformën Truth Social në muajin maj, Trump deklaroi:
“I kam bërë me dije prej kohësh Tim Cook-ut të Apple se pres që iPhone-t që do të shiten në SHBA të prodhohen në Amerikë, jo në Indi apo gjetkë. Në të kundërt, do të aplikohet një tarifë të paktën 25% për çdo njësi.”
Sipas burimeve nga Shtëpia e Bardhë, CEO i Apple, Tim Cook, ka zhvilluar disa takime private me Presidentin Trump, ku është diskutuar ndikimi i tarifave ndaj kompanisë. Gjatë prezantimit të bilancit tremujor, Cook deklaroi se Apple pret të përballet me 1.1 miliardë dollarë kosto të lidhura me tarifat vetëm gjatë tremujorit të shtatorit.
Njoftimi i ri për investimin prej 100 miliardë dollarësh vjen në një kohë kur Trump po përgatitet të rrisë tarifat ndaj Indisë, vend ku aktualisht montohet një pjesë e madhe e iPhone-ve të destinuar për tregun amerikan.
Apple i bashkohet një liste në rritje të kompanive të mëdha teknologjike që po zgjerohen në SHBA. Texas Instruments ka njoftuar një investim prej 60 miliardë dollarësh për prodhimin e gjysmëpërçuesve, TSMC ka investuar 100 miliardë dollarë për ndërtimin e fabrikave në SHBA, ndërsa Nvidia deklaroi në prill se do të ndërtojë superkompjuterët e saj brenda territorit amerikan.
