Kreu i Partisë Demokratike, Sali Berisha, ka reaguar pas deklaratës së ministrit të Jashtëm lidhur me letrën e publikuar një ditë më parë nga vetë ai, e cila sipas Berishës u dërgua misioneve ndërkombëtare vetëm një orë pas publikimit të raportit për zgjedhjet e 11 majit.
Berisha e cilësoi këtë veprim si provë të qartë të përfshirjes së qeverisë në atë që ai e quan “farsë elektorale”. Sipas tij, letra konfirmon se shteti dhe partia janë bërë një, në kundërshtim me parimet demokratike.
“Një letër ndaj misioneve vëzhguese ndërkombëtare, një orë pas publikimit të raportit të tyre, mund ta dërgonte opozita, por jo ministri i Jashtëm i një vendi që synon të jetë demokratik. Ky akt e bën atë palë me PS-në dhe dëshmon atë që kanë theksuar edhe vetë misionet: shteti dhe partia ishin një,” deklaroi Berisha.
Ai e cilësoi ministrin “avokat të farsës elektorale” dhe akuzoi gjithashtu prokurorin Dumanin për bashkëpunim në këtë qëndrim. Berisha dënoi ndjekjet ligjore ndaj disa përfaqësuesve dhe aktivistëve të PD-së, duke përmendur rastin e deputetit Asllan Dogjani dhe aktivistit Shkëlqim Hoxha.
Berisha: Narko-ministri i Jashtëm reagoi dje në mënyrën më të papërgjegjshme, duke faktuar pakundërshtueshëm se ai, njëlloj si Altin Troplini, është një ushtar i Edi Ramës, është një avokat i farsës elektorale të 11 majit 2025.
Për çdo qytetar shqiptar, unë shtroj pyetjen: një letër misioneve vëzhguese ndërkombëtare vetëm një orë pas publikimit të raportit të tyre, a mund t’i dërgonte ministri i Jashtëm i vendit? Një letër atyre misioneve mund t’u dërgonte opozita, por kurrë dhe në asnjë radhë ministri i Jashtëm nuk bëhej dot palë me PS-në veçse duke dëshmuar atë që kanë shkruar misionet e vëzhgimit se në Shqipëri partia dhe shteti ishin një dhe për rrjedhojë nuk mund të ketë zgjedhje por veçse farsë.
Pra, letra e ministrit dhe reagimi i tij mbrapa, fakton edhe njëherë se shqiptarët u përballën me një farsë elektorale. Ministri vetë, është bashkë me Dumanin, një avokat i këtij krimi të shëmtuar. Unë dënoj me forcën më të madhe këtë deklaratë, reagimin e tij. Sikundër deklaroj edhe përpjekjet e Altin Troplinit për të përdorur ligjin kundër opozitës.
Keni parasysh sot se deputeti Asllan Dogjani është në ndjekje absolutisht pa asnjë shkak ligjor. Tani përpiqen, po merren me një problem të zgjedhjeve të vitit 2023 me aktivistin e PD, Shkëlqim Hoxha sepse disa paskan paguar disa bileta për të ardhur dhe votuar në Rrogozhinë. Pra, gjithçka bëhet për të mbuluar farsën.
