Kryedemokrati Sali Berisha ka vijuar edhe këtë të martë denoncimet nga selia blu. Sipas Berishës, turizmi në Shqipëri ka dështuar në mënyrë spektakolare.
Kryedemokrati thotë se shifrat e paraqitura nga qeveria Rama janë të manipuluara dhe shton më tej se shkak i dështimit të turizmit gjatë 2 viteve të fundit, janë eurot e drogës.
“Turizimi është dështimi më spektakolar ekonomik i narkoshtetit shqiptar. Narkoeuro është toksina e vërtetë e ekonomisë dhe turizmit të Shqipërisë. Potenciali turistik i vendit është i jashtëzakonshëm. Nga viti 2005 deri në vitin 2012, pas ndërtimit të infrastrukturës rrugore dhe dixhitalizimit, numri i turistëve u rrit nga 300 mijë që ishte në 2005, në 4 milionë e 700 mijë.
Numri i turistëve ka vazhduar të rritet në mënyrë të padiskutueshme. 2-3 vitet e fundit është paraqitur një numër prej 10 milionësh, që përbën një mashtrim të vërtetë, sepse përfshin të gjithë pasagjerët shqiptarë dhe rajonalë të linjave të lira të Rinasit. Por pavarësisht nga ky mashtrim i madh, numri i turistëve është rritur në mënyrë të pamohueshme. Mirëpo viti i kaluar shënoi një rënie drastike në sezonin turistik të turistëve në brigjet, plazhet e deteve dhe liqeneve të Shqipërisë. Kjo rënie drastike vazhdoi edhe këtë vit akoma më e thellë.
Shkaku i kësaj rënie në mënyrën më të pabesueshme por edhe të pandershme, fshihet nga narkoqeveria, nga mediat e narkoqeverisë, fshihet nga ekonomistët e vendit, mediat e vendit dhe operatorët turistikë. E bëjnë nga padija apo frika dhe kodi i mafias, nuk mund ta them.
Por u them me përgjegjësi se shkaku madhor i kësaj rënie dramatike është narkoeuro. Narkoeuro është toksina e vërtetë e turizmit, toksina e vërtetë e ekonomisë shqiptare. Rënia e vlerës së euros në 35%, rënia e vlerës së dollarit në 35%, rënie e shpejtë dhe instalimi i saj në këtë nivel, bëri që turisti që më parë me 100 Euro blinte shërbime dhe mallrat e caktuara, një vit më parë për të blerë të njëjtën sasi duhej të shpenzonte në Shqipëri 135 euro. Të fshehësh këtë bëhesh bashkëfajtor në një krim”, u shpreh Sali Berisha.
