Gjatë orëve të fundit janë regjistruar 16 vatra zjarri nëpër territorin e vendit, nga të cilat njëra mbetet aktive dhe një tjetër është nën monitorim për shuarje të plotë.
Zjarri aktiv ndodhet në fshatin Dhores, në bashkinë Skrapar, ku vijojnë punimet për fikjen e tij. Ndërkohë, zjarri në Parkun Kombëtar të Lurës, në bashkinë Dibër, është vënë nën kontroll dhe po mbahet nën vëzhgim për të siguruar shuarjen e plotë.
Vatra të tjera zjarri janë shuar në zona të ndryshme të vendit, përfshirë malin e Allushit në Bulqizë, rrugën Delvinë-Kardhiq, fshatin Gumenicë, lagjet Shijan dhe Nr.2, si dhe zona të tjera në Himarë, Vlorë, Kavajë, Lezhë, Korçë, Maliq dhe Selenicë.
Në terren janë angazhuar 16 automjete zjarrfikëse dhe mbi 150 efektivë dhe forca operacionale në bashkëpunim me autoritetet lokale.
Banorëve u bëhet thirrje të tregojnë kujdes, të shmangin ndezjen e zjarreve dhe të raportojnë menjëherë çdo vatër të re.
