Një vrasje me armë zjarri është regjistruar mbrëmjen e kësaj të hëne në fshatin Paçram të Vaut të Dejës.
Autoritetet policore raportojnë se shtetasi Frrok Lleshaj, 65 vjeç është gjetur në rrugë rreth orës 21:00, pa shenja jete, dyshohet i vrarë me armë zjarri.
Burime për mediat bëjnë me dije se viktima rezulton më parë i dënuar për vrasje dhe nga hetimet paraprake pista e mundshme ku po heton Policia është ajo e gjakmarrjes.
Frrok Lleshaj, një ish-efektiv policie në vitet ’90, rezulton se ka vrarë kushëririn e tij Dodë Lleshaj më shumë se dy dekada më parë, në vitin 1995. Ai u arrestua në atë kohë për vrasjen, por u arratis nga burgu dy vite më vonë, në vitin 1997 dhe në vitin 2006 u arrestua sërish.
Për këtë krim ai ishte dënuar me 25 vite burgim, të cilin e kishte përfunduar vetëm dy vite më parë, duke u liruar nga burgu më 16 Mars të vitit 2023,
“Me vendim nr.37, datë 17.03.2006, të Gjykatës Shkodër, dënuar 25 vite burgim për vrasje me dashje dhe është liruar më datën 16.03.2023 nga IEVP Shkodër”, thuhet në dosje.
Mësohet se Frrok Lleshaj ka qenë duke ecur në këmbë në rrugët e fshatit Paçram në momentin kur është qëlluar me arm zjarri nga persona ende të paidentifikuar.
Ka qenë një kalimtar i rastit, ai i cili e ka gjetur 65-vjeçarin të vrarë në rrugë dhe më pas ka njoftuar familjarët dhe Policinë.
Autoritet thonë se është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe për identifikimin dhe kapjen e autorit/ëve.
Njoftimi i Policisë
Vau i Dejës / Informacion paraprak
Rreth orës 21:00, në fshatin Paçram, Vau i Dejës, në rrugë është gjetur pa shenja jete shtetasi F. Ll., 65 vjeç, i cili dyshohet se është vrarë me armë zjarri.
Shërbimet e Policisë ndodhen në vendngjarje.
Ndërkohë, është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe për identifikimin dhe kapjen e autorit/ëve.
