Tre shtetas shqiptarë janë arrestuar në Itali pasi kishin kthyer një fermë në një laborator për përpunimin e kokainës. Të arrestuarit janë të moshave 37, 38 dhe 39 vjeç dhe akuzohen për posedim dhe shpërndarje të lëndëve narkotike.
Sipas autoriteteve italiane, gjatë operacionit janë sekuestruar rreth dy kilogramë kokainë e përpunuar, si dhe pajisje të plota për përzierjen dhe paketimin e drogës. Laboratori funksiononte në një banesë me strukturë ferme në zonën e Pontenure, ku shqiptarët përzienin kokainën e pastër me acid dhe pluhur, për ta shitur më pas në treg.
Policia kishte vënë në ndjekje dy prej tyre që udhëtonin me makina të ndryshme dhe u takuan fillimisht në një bar. Më pas, ata shkuan drejt fermës ku u bashkuan me një person të tretë. Hetuesit i ndoqën dhe i kapën në flagrancë teksa pastronin dhe transportonin pajisjet për përpunimin e drogës, përpara se ta dorëzonin sasinë e kokainës një blerësi aty pranë.
Gjatë kontrolleve në banesë u gjetën përveç drogës, edhe një kilogram përzierës, detergjentë, një furrë elektrike, peshoresa precize si dhe rreth 4000 euro cash, që dyshohet se janë përfituar nga aktiviteti kriminal.
Hetimet po vijojnë për të zbuluar lidhjet e mundshme të këtij grupi me rrjete më të gjera të trafikut të drogës në Itali.
