Pas daljes nga Prokuroria e Posaçme (SPAK), avokati i ish-presidentit Ilir Meta, Kujtim Cakrani, deklaroi për mediat se klientit të tij i është komunikuar zyrtarisht aktakuza lidhur me çështjet CEZ-DIA dhe lobimin në emër të ish-LSI-së. Ai theksoi se kjo procedurë nuk ka sjellë elementë të rinj dhe se mbrojtja vazhdon të kërkojë hetim të plotë për origjinën e pagesave të lobimit.
“Nuk ka asnjë zhvillim të ri. Zoti Meta ka dhënë shpjegimet e tij dhe ka kërkuar që të zbardhet se kush ka kryer pagesat për lobimin në emër të LSI-së. Deri më tani, prokuroria nuk ka ofruar asnjë informacion për këtë çështje”, u shpreh Cakrani.
Sipas tij, akuzat për korrupsion dhe pastrim parash mbeten të pambështetura, ndërsa dosja për CEZ-DIA është përmbledhur në vetëm 30 faqe, krahasuar me 116 fashikuj që, sipas mbrojtjes, përmbajnë dokumente që tregojnë mungesën e lidhjes së Metës me ndonjë veprim të paligjshëm.
“Janë afro 60 mijë faqe materiale që provojnë se zoti Meta nuk ka pasuri të pajustifikuar dhe nuk ka përfituar nga ndonjë akt korruptiv. Verifikimet janë bërë edhe në institucione financiare të vendeve të BE-së dhe nuk është konstatuar asnjë shkelje”, tha Cakrani.
Ai shtoi se procesi do të vijojë përmes rrugëve të rregullta gjyqësore dhe se mbrojtja do të ndjekë çdo hap ligjor të nevojshëm. Sipas tij, edhe pse seanca e sotme ka qenë e qetë, procesi nuk mund të shkëputet nga ndikimi politik.
“Kjo çështje ka një ngarkesë të dukshme politike. Ne do të përballemi në gjykatë dhe do të kërkojmë drejtësi bazuar në fakte”, përfundoi avokati i Metës.
Ilir Metës i komunikohet sot mbyllja e hetimeve, do transportohet nga burgu në SPAK
