PSG ka marrë një lajm të keq, pasi ndaj një prej yjeve të skuadrës, mbrojtësit Ashraf Hakimi, është hapur një procedim penal që mund të çojë në dënimin e tij deri me 15 vite burg.
Sipas “Le Parisien”, futbollisti maroken akuzohet se ka përdhunuar një femër e cila ka qenë në banesën e tij. Ngjarjet i përkasin shkurtit të vitit 2023, por pas më shumë se dy vitesh hetime, policia ka arritur në konkluzionin se ka prova të mjaftueshme për të nisur një procedim penal kundër Hakimit dhe do të jetë gjykata ajo që vendosë për fajësinë e tij.
Ngjarja u bë publike në vitin 2023, kur një vajzë akuzoi Hakimin se e kishte përdhunuar në banesën e këtij të fundit, kur ajo kishte shkuar ta takonte personalisht pasi ishin njohur në rrjetet sociale.
Në takimin e datës 8 shkurt 2023, ajo insistonte se pasi kishte shkuar në shtëpinë e Hakimit, ai kishte kryer akte pa miratimin e saj që cilësohen si dhunë seksuale.
Nga ana e tij, Hakimi e ka cilësuar gjithmonë këtë si një shantazh që i ishte bërë me qëllimin për t’i zhvatur para dhe ka pretenduar se është i pafajshëm. Tani i mbetet gjykatës të tregojë se kush ka të drejtë në këtë mes.
