Policia e Vlorës ka dalë me një komunikatë shtesë për mediat për të sqaruar ngjarjen e regjistruar në orët e para të mëngjesit të sotëm, ku pas një konflikti mes disa shtetasve në ambientet e një lokali në Borsh, njëri prej tyre mbeti i plagosur me armë zjarri.
Sipas bluve të qytetit bregdetar, 42-vjeçari Hekuran Çelaj është dhunuar fillimisht nga shtetasi E. V., 55 vjeç. Pasi sherrit, ai është larguar nga lokali dhe është kthyer sërish me armë zjarri automatik, duke qëlluar me breshëri në drejtim të automjetit që drejtohej nga 33-vjeçari Erald Shullazi, duke e plagosur në shpatull dhe në këmbë. Po ashtu, raportohet se Hekuran Çelaj ka goditur me qytën e armës edhe 43-vjeçarin Albert Dollaku.
“Më datë 31.07.2025, rreth orës 02:20, në një lokal në fshatin Borsh, Himarë, shtetasi Hekuran Çelaj, 42 vjeç, banues në Borsh, dyshohet se është përfshirë në një konflikt fizik, për motive të dobëta, gjatë të cilit është goditur me grushte nga shtetasi E. V., 55 vjeç, banues në Tiranë. Pas këtij momenti, shtetasi H. Ç. është larguar nga ambientet e lokalit dhe është rikthyer me një armë zjarri automatik, me të cilën ka qëlluar në drejtim të automjetit tip “Volkswagen”, me drejtues shtetasin Erald Shullazi, 33 vjeç, duke e plagosur në shpatull dhe në këmbë. Ky shtetas ndodhet aktualisht në spital, jashtë rrezikut për jetën. Gjithashtu, dyshohet se shtetasi Hekuran Çelaj ka goditur me qytën e armës edhe shtetasin Albert Dollaku, 43 vjeç.” – thuhet në njoftimin e Policisë.
Uniformat blu kanë arrestuar autorin e plagosjes, shtetasin Hekuran Çelaj, i akuzuar për veprat penale “Vrasje me dashje”, mbetur në tentativë, dhe “Prodhimi dhe mbajtja pa leje e armëve luftarake dhe e municionit”. Gjithashtu, është shpallur në kërkim dhe shtetasi E. V., për veprën penale “Dëmtime të tjera me dashje”.
Bëhet me dije se në vendin e ngjarjes janë sekuestruar në cilësinë e provës materiale 4 gëzhoja dhe një krehër me fishekë.
Materialet procedurale i kanë kaluar Prokurorisë së Vlorës për veprime të mëtejshme.
