Komisioni i Ankesave dhe Sanksioneve (KAS) nuk ka mundur të gjejë një qëndrim të përbashkët mes anëtarëve për të depozituar padi në prokurori ndaj numëruesve të votave në zgjedhjet e 11 majit në qarkun e Fierit, ku gjatë procesit të rinumërimit u konstatuan tjetërsim të theksuar votash brenda llojit.
Për këtë arsye, KAS i është drejtuar me një shkresë zyrtare Komisionerit Shtetëror të Zgjedhjeve, Ilirjan Celibashi, të cilit i kërkon që të nisë një hetim administrativ. Ky hetim, sipas tyre, nuk duhet të nisë vetëm për qarkun e Fierit, por edhe për qarqet e tjera ku pati rinumërim, si Tirana, Durrësi dhe Elbasani.
“Rinumërimi dhe rivlerësimi i votave në këto zona zgjedhore provoi, në disa raste, mospërputhje të theksuara midis tabelave të rezultatit të grupeve të numërimit nga KZAZ-të respektive dhe gjendjes faktike të fletëve të votimit në kuti gjatë procesit të rinumërimit në procedurën ankimore në KAS. Këto mospërputhje duhet të hetohen në një proces të mëtejshëm administrativ nga ana juaj, për të identifikuar anëtarët pjesë e Grupeve të Numërimit të Votave…”, thotë KAS.
Këtë hetim të thelluar KAS-i e argumenton duke nënvizuar se duhen ndarë rastet e shkeljeve administrative nga ato që përbëjnë vepra penale dhe se këtë verifikim, sipas këtij institucioni mund ta bëjë vetëm Celibashi.
“Ky hetim administrativ ka rëndësi për të identifikuar dhe për të dalluar rastet që formojnë kundërvajtje administrative, rastet që ngrejnë dyshimin e arsyeshëm të bazuar në prova për kryerjen e veprave të caktuara penale në fushën e zgjedhjeve, nga rastet që nuk formojnë shkak për procedim.”
Ky është akti i fundit i KAS-it për zgjedhjet eparlamentare të 11 majit, pasi institucioni përfundoi shqyrtimin e të gjitha pretendimeve dhe mbylli zyrtarisht procesin ankimor.
Tashmë, Celibashi pritet të vendosë nëse do të ndërmarrë kallëzime penale ndaj numëruesve apo do ta trajtojë çështjen vetëm në kuadër të gabimeve njerëzore.
