Klubi nga Arabia Saudite, Al Nassr ka bërë një tjetër goditje të madhe në merkato, duke siguruar shërbimet e sulmuesit Joao Felix. Portugezi largohet nga Chelsea pas një marrëveshjeje të arritur mes palëve.
Sipas burimeve të medieve evropiane, 25-vjeçari ka marrë “dritën jeshile” dhe ka udhëtuar drejt Arabisë Saudite, ku pritet të kryejë vizitat mjekësore dhe më pas të zyrtarizohet si lojtari më i ri i Al Nassr.
Marrëveshja kap vlerën e 30 milionë eurove të paguara menjëherë, plus 20 milionë euro bonuse të mundshme, në varësi të performancës dhe objektivave të arritura.
Drejtuesit e Al Nassr nuk kanë ndërmend të ndalen me kaq. Në planet e klubit është edhe sulmuesi brazilian Antony, i cili është kthyer në radhët e Manchester United pas huazimit te Real Betis.
Sipas raportimeve të “Footmercato”, lojtari është jashtë planeve të trajnerit për sezonin e ardhshëm dhe për të është paraqitur një ofertë konkrete nga Al Nassr.
Për momentin nuk ka ende një vendim përfundimtar nga “Djajtë e Kuq”, por negociatat pritet të vazhdojnë në ditët në vijim, me mundësinë reale që edhe Antony të ndjekë rrugën drejt Ligës Profesionale Saudite.
