Dy të rinj, një vajzë dhe një djalë janë arrestuar nga Policia e Librazhdit në bashkëpunim me atë të Elbasanit, pasi akuzohen se kanë grabitur me dhunë sendet personale të dy të moshuarve.
Në kuadër të operacionit të koduar “Partners in crime” (Partnerë në krim) janë vënë në pranga shtetasit Vatë Kolndreu, 32 vjeç, banues në Shkodër dhe Migena Kodhelaj, 33 vjeçe, banuese në Tiranë, për veprën penale “Vjedhja me dhunë”, kryer në bashkëpunim.
“Nga hetimet e kryera gjatë operacionit dyshohet se shtetasit Migena Kodhelaj dhe Vatë Kolndreu, në bashkëpunim me njëri-tjetrin, kanë kryer dy vjedhje në fshatin Sheje, konkretisht:
- -Më datë 25.07.2025, i kanë marrë me dhunë portofolin me një shumë parash, një 68-vjeçari, i cili është dëmtuar lehtë;
- -Më datë 27.07.2025, i kanë marrë me dhunë çantën dhe celularin, një 62-vjeçareje, e cila është dëmtuar lehtë. Ajo ka marrë mjekim në spitalin e Librazhdit dhe është jashtë rrezikut për jetën.” – thuhet në njoftim.
Ndërkohë, uniformat blu kanë arrestuar edhe shtetasin Emirjon Shpendi, 40 vjeç, banues në Pogradec, i cili akuzohet për veprën penale “Përvetësimi i parave ose mallrave të vjedhura”. Shpendi u ka blerë dy të rinjëve celularin që ia kishin vjedhur 62-vjeçares
Policia thotë se ka sekuestruar sende personale dhe 4 celularë, të dyshuara të vjedhura, automjeti, veshje të ndryshme dhe kapuç, që përdornin dy të arrestuarit dhe se vijonë hetimet për dokumentimin e plotë të veprimtarisë kriminale të këtyre shtetasve.
Materialet procedurale i janë referuan Prokurorisë së Elbasanit për veprime të mëtejshme.
