Në mars të këtij viti, Autoriteti Rrugor Shqiptar shpalli një tender me fond limit 506.6 milionë lekë ose 5.22 milionë euro për të lidhur Tunelin e Llogarasë me rrugën ekzistuese Palasë-Dhërmi. Gara u shpall se do të zhvillohej në 28 prill. Por pak ditë para tenderit, ARRSH vendosi në mënyrë të beftë anullimin e tij.
Në dokumentat zyrtare të depozituara në Agjencinë e Prokurokimit Publik, ARRSH shkruante se motivi i anullimit të tenderit ishte për shkak se dokumentat përmbanin mangësi dhe gabime të rëndësishme, por pa dhënë shpjegime të mëtejshme se për çfarë gabimesh bëhej fjalë.
Anullimi i tenderit te pare ne Prill
Megjithatë gabimet dhe mangësitë do të mësoheshin vetëm 3 muaj më vonë. Tre ditë më parë, ARRSH ka vendosur të shpallë sërish tenderin për ndërtimin e Rrugës Lidhëse të Tunelit të Llogarasë. Por këtë herë fondi limit është rritur në 576.4 milionë lekë ose gati 6 milionë euro.
Tenderi i ri
Në dokumentat e depozituara në APP, Autoriteti Rrugor Shqiptar nuk i shpjegon arsyet se pse kostoja e tenderit u rrit brenda tre muajve me gati 800 mijë euro. Por kjo e anullimeve është tashmë një manovër, e cila po përdoret gjerësisht për të rritur koston e prokurimeve në kurriz të taksapaguesve.
Dhe tek ARRSH me sa duket nuk heqin dorë nga zanati, pavarësisht se krerët e këtij institucioni ose kanë përfunduar në burg ose janë me statusin e të pandehurit.
Vepra
Tenderi për rrugën lidhëse të Tunelit të Llogarasë, parashikon rehabilitimin e segmentit që nis 1 kilometër në dalje të tunelit dhe përfundon në rrethrrotullimin e rrugës ekzistuese Palasë-Dhërmi.
Në total bëhet fjalë për një segment me gjatësi totale 1.1 kilometër, nga të cilat 400 metër janë të ndërtuara sakaq dhe kanë nevojë vetëm për rehabilitim, ndërsa 600 metër janë ndërtim i ri.
Rritja e kostos me mbi 15 për qind brenda tre muajve ngre pikëpyetje të forta mbi integritetin e këtij tenderi, aq më tepër kur bëhet fjalë gjithmonë për një rrugë të kategorisë C2, ose siç njihet ndryshe Rrugë Interurbane Dytësore. A u anullua tenderi i prillit vetëm me qëllimit për të rritur më shumë koston dhe për të marrë edhe 800 mijë euro të tjera nga buxheti i shtetit?/ Kapitali.al
