Në foton e mësipërme është 56-vjeçari Anesti Rama nga fshati Frashër i Fierit së bashku me vajzën e tij, 26-vjeçaren Emanilda Rama, e cila dyshohet se e vrau atë mënyrë barbare, duke e mbytur me tel.
Bashkë me 26-vjeçaren u arrestua dhe e ëma e saj dhe bashkëshortja e viktimës, 53-vjeçarja,Valbona Rama, pasi dyshohet se pas vrasjes, nënë e bijë kanë tentuar që të fshihnin ngjarjen, duke pastruar trupin e 56-vjeçarit, me qëllim inskenimin si aksidentale.
Emanilda Rama, pasi e mbyti me tel babain, dyshohet se e dëmtoi edhe në pjesët intime, duke e prerë disa herë, teksa e kishte goditur edhe në pjesën e kokës.
Pasi kreu vrasjen, 26-vjeçarja telefonoi policinë duke pretenduar se babai kishte humbur jetën si pasojë e një ngjarje aksidentale. Por, pas kryerjes së veprimeve të para hetimore, u krijuan dyshimet se 56-vjeçari nuk kishte humbur jetën aksidentalisht.
Vajza ka pranuar më pas krimin në polici, duke treguar se i ati ishte fanatik dhe se nuk e linte që të vishej si donte apo të argëtohej. 26-vjeçarja i ka thënë grupit hetimor se 56-vjeçari i ushtronte presion në përditshmërinë e saj dhe se kishte debate të shpeshta me të atin pasi nuk i jepte para kur ajo i kërkonte.
