Sekretari i Përgjithshëm i OKB-së, António Guterres, ka ngritur alarmin për situatën humanitare në Gaza, duke e cilësuar gjendjen si një “shfaqje horror”, ku uria po troket në çdo derë dhe sistemi humanitar është pranë kolapsit.
Në një fjalim në Këshillin e Sigurimit të Kombeve të Bashkuara, Guterres tha se “në mbarë botën, shohim shpërfillje totale të së drejtës ndërkombëtare, nëse jo shkelje të plotë të saj”, duke theksuar se Gaza është shembulli më i qartë i kësaj gjendjeje dramatike.
Ai paralajmëroi se kequshqyerja në rajon është në rritje të frikshme, ndërsa sistemi humanitar i OKB-së nuk ka më kushtet për të funksionuar: mungon hapësira për të ofruar ndihmë dhe nuk ka siguri për punonjësit humanitarë.
Sipas tij, ofensiva e fundit e ushtrisë izraelite në Deir al-Balah në Gazën qendrore po e përkeqëson më tej situatën, duke shtuar “shkatërrim mbi shkatërrim”.
Guterres tha se është i tmerruar edhe nga sulmet ndaj objekteve të OKB-së në Gaza, përfshirë zyrat, depot dhe rezidencat e Organizatës Botërore të Shëndetësisë.
